Yemenimi sorsukkumatuut 19-it tigusarineqarput
Yemenip illoqarfiisa pingaarnersaanni Sana’a-mi amerikamiut aallartitaqarfianni ippassaq qaartartumeerinninnerup kingorna
islamisiortut sorsukkumatuut 19-it Yemenimi pisortanit tigusarineqarput. Sorsukkumatuut al-Qaeda-mut attummaassuteqartut qaartartumeerisimasutut pasineqarput.
Allattoq Louise M. Kleemann
Amerikamiut aallartitaqarfiat qaartartumeeriffigineqarpoq raketillu atorlugit saassunneqarluni. Aallartitaqarfik ukiup affaata ingerlanerani aappassaa saassunneqarpoq, ippassarlu saassussinermi inuit 16-it ajunaarput.
Qaartartunik saassussinermi Yemenimi islamisiortut, Islamisk Jihad, saassussinermik akisussaasuullutik nalunaarput, saassusseqqinniarlutillu aarlerisaaripput, islamisioqatitik Yemenimi parnaarussaaqqasut iperagaatinneqanngippata.
Amerikamiut aallartitaqarfiat saassunneqarmat amerikamiunik toqutaasoqarsimanngitsoq, amerikamiut atorfilittaat oqarpoq.