Yemen Syriatulli akerliussutsimik takutitsiviulerpoq

Kangiani qiterlermi nunat eqqissiviilliorfiusut nunanut eqqaamiorisaanut saruaapput.

Yemen-imi illoqarfinni anginerusuni inuit hundretusind-inik amerlanerusut akerliussutsimik takutitsipput.

Akerliussutsimik takutitsisut ilaat ukiorpassuarni præsidentiusimasumut Ali Abdullah Saleh-mut akerliunertik takutinniarlugu akerliussutsimik takutitsipput, allat præsidentimut illersuinerminnik takutitsisut.
Illuatungeriit avissaartinniarlugit pisortat iliuuseqarniarsaripput.

Præsident Ali Saleh ukiup naalernerani tunuarniarluni neriorsuivoq, qinersisoqarnissaalu neriorsuutigalugu.
Præsident Ali Saleh Yemenimi innutaasunit amerlanernit nuannarineqanngilaq, Yemen-imi innuttaasut ajunnginnerusunik atugaqalernissaannik neriorsuisimanini piviusunngortissimanngimmagu.

Syriami naalakkersuinikkut eqqissiviilliornerit suli ingerlapput.

Syriami isumannaallisaanermut sakkutuut pingasunngormat sisamanngormallu saassussineranni inuit 100 missaanniittut toqutaasut illoqarfimmi Deraa-mi ullumi ilisaaneranni inuit tuusintit najuupput.

Taamaalinerani Syriami illoqarfiit pingaarnersaanni Damaskus-imi naalakkersuisunut isumaqataanngisut akerliussutsimik takutitsipput.

Naalakkersuisunut akerliusorpassuit tigusarineqarput, akerliussutsimillu takutitsisut isumannaallissaanermut sakkutuunit avissaartinneqarlutik.

Sapaatit akunnerini kingullerni akerliussutsimik takutitsinerit kingunerisaanik politikkikkut aningaasarsiornikkullu allannguisoqarnissaanik Syriap ukiorpassuarni præsidenterisaa Assad neriorsuuteqarpoq.

Ilaatigut inatsisit killilersuutaasut 1963-imiit atuussimasut atorunnaarsinniarpai.