Nipilersoqatigiinni Siissisumi inuttaviusut tusarnaartitsilersut
Kulturikkut illorsuaq Katuaq nittartakkamini allappoq nipilersoqatigiinni siuttuusoq Karl-Enok Mathiassen assigiinngitsunik nipilersoqateqartarluni ukiuni 22-ni ingerlaavartumik tusarnaartitsisarsimasoq.
Nipilersoqatigiit 1994-imi immiusseqqaarput ingerlaannarlu nuannarineqalerlutik, kingornalu aamma KODA-mit nipilersornermik nutaamik nunatsinnut eqqussisutut nersornaaserneqarput.
Erinnat nunatsinni ilisarisimaneqarluartut tassaapput: Nersussuaq, Puuluki, Imarmiutarsuaq aamma Pulateriaarsuk.
Maannalu taakkuullutik ukiut arlallit nipilersoqatigiissimanatik imminnut naneqqissimapput, nunatsinnilu tusarnaartitsinerit ingerlateqqittalerlugit. Katuallu paarlersuani maanna nuannattoqassamaaleqaaq.
Erinarsortuat maqaasineqartoq
Saqqummersitsinerni erinarsortuat Jens Samuelsen nipilersoqatigiinnut qanittukkut uterpoq, tamannalu inuppassuarnut tusarluarnartuusimavoq. Siissisoq ukiorpassuarni nuannarineqartuarsimavoq, erinarsortuusorli Jens Samuelsen maqaasineqartarsimaqaluni, Katuaq taama allappoq.
Katuap paarlersuani tusarnaartitsilerunik nipilersoqataasussat tassaapput: Karl-Enok Mathiassen kitaarertoq, Knud Mathiassen bassertoq, Villads Kristiansen tumerparpaartoq kiisalu erinarsortoq Jens Samuelsen.
Tusarnaartitsineq pissaaq tallimanngornermi novembarip sisamaani nal. 23.45 – 01.00
Katuami sapaatit-akunnerata naanerani tusanaartitsisussat allat tassaapput Four Tupilaks, Malik aamma Liima Inui.
Tusarnaartitsinissaq pillugu uani paasisaqarnerusinnaavutit.
