WWF: Nannut ulorianartorsiortinneqarnerat iliuuseqarfigiumanngilaat
Nannut illersorneqarnissaat pillugu isumaqatigiissut 1973-imi nunat issittut akornanni atsiorneqarpoq.
- Taamanikkut nannut piniagaapiloornerat ulorianartorsiortitsinerpaatut nalilerneqarpoq. Ullumikkut silap pissusaata allanngoriartornerata kingunerisaanik sikup aakkiartupiloornera nannunut
ulorianartorsiortitsivoq, WWF-mit oqaaseqartartoq Gitte Seeberg oqarpoq.
Pinngortitaq pillugu nunarsuaq tamakkerlugu suliniaqatigiiffik aamma avatangiisinik illersuiniartut allat Tromsømi ataatsimiinnermi peqataatinneqanngillat. Tamatumunnga patsisaasoraat ataatsimiinneq sioqqullugu Kalaallit Nunaat piumasaqarsimammat, naalakkersuinikkut apeqqutit oqallisigineqarneranni ataatsimiinneq matoqqasuussasoq.
Illuatungaanilu Kalaallit aallartitaasa Radioaviisimut oqarnerat malillugu WWF-ip ataatsimiinnermi peqataanissaat pilersaarutaasimanngilaq.
Nannut nungutaannginnissaat pillugu issittumi nunallit Norge-mi Tromsømi ulluni pingasuni ataatsimiinnerat ullumi naammassineqarpoq. Ataatsimiinnermi nunat peqataatitaqartut tassaapput Kalaallit Nunaat, Norge Canada Rusland aamma USA.