WWF: Namminersorlutik Oqartussat suleqatigerusuppavut
Suleqateqarnissamik saaffiginnissut piniarnermut Naalakkersuisup Karl-Kristian Krusep oqaaseqarfigisinnaanagu ippassaani KNR-imut oqarpoq, saaffiginnissummik tigusaqarsimannginnini tunngavilersuutigalugu.
Isumaqarpunga paatsoortoqarsimasoq, Namminersorlutik Oqartussat attaveqarfigereerpagut, Pinngortitaq pillugu nunarsuaq tamakkerlugu suliniaqatigiiffiup WWF-ip Danmarkimi immikkoortortaqarfiani tusagassiinermut pisortaq, Rune Langhoff, KNR-imut oqarpoq.
Namminersorlutik Oqartussat WWF-imut saaffinnippoq
Mailikkut attaveqatigiinnerit, KNR-imit pissarsiarineqartuni atuarneqarsinnaavoq, aalisarnermut piniarnermut nunalerinermullu naalakkersuisoqarfik nunarsuaq tamakkerlugu pinngortitaq pillugu suliniaqatigiiffimmut WWF-imut aggustip qaamaataani saaffiginnissuteqartoq.
Aamma atuaruk Kruse: Nannut illoqarfinnukartut toqunneqarsinnaapput
Saaffiginnissut taanna WWF-imit ulloq taanna akineqarluni.
- Piniarnermut naalakkersuisoqarfiup saaffiginissutaa akineqarpoq. Ittoqqortoormiini nannut nakkutigineqarnertarnerat pillugu Namminersorlutik Oqartussat suleqatigiissinnaassagigut neriuutigaarput.
- Tamanna Ittoqqortoormiini innuttaasunut taamatullu nannunut pingaaruteqartorujussuuvoq, Rune Langhoff oqarpoq.
Canadami suleqatigiinneq ajunngitsoq
Rune Langhoffip erseqqissaatigaa, Canadami nunap immikkoortuani Nunavummi naalagaaffiup sinniisuinik ajunngitsumik suleqateqartoqartoq.
- Nunavummi nannunik nakkutilliisoqarpugut, Ittoqqortoormiuni nannunik nakkutiliisunut assingusunik.
- Nunavummi nunaqarfik Arfiat nannunik aamma ajornartorsioqarpoq nannut ukiup sivisunersaani nunaqarfimmukartaramik, ajornarsiullu Ittoqqortoormiunit ilungersunarnerulluni.
Nunavummi nannut nakkutigineqartarnerannut naalagaaffiup sinniisua suleqatigalugu aningaasalersorneqarpoq. Taamatut aaqqiinneq nunatsinni atorneqarsinnaaneranut WWF-ip ammaffigaa.
- Namminersorlutik Oqartussat qanoq iliornissaanut ammavugut. Suleqatigiikkusuinnarpugut, WWF-imi tusagassiinermut pisortaq Rune Langhoff oqarpoq.
Aalisarnermut Piniarnermut Nunalerinermullu Naalakkersuisoq Karl-Kristian Kruse oqaaseqartinniarneqaraluarpoq tamannali iluatsissinaasimanngilaq.
