Kruse: Nannut illoqarfinnukartut toqunneqarsinnaapput
Nannullu illoqarfimmiinnginnissaat anguniarlugu Pinngortitaq pillugu nunnarsuaq tamakkerlugu suliniaqatigiiffik WWF nannunik nakkutilliisartunik pilersitsivoq.
Innuttaasulli isumannaatsuunerat Pinngortitaq pillugu nunnarsuaq tamakkerlugu suliniaqatigiiffiup akisussaaffiginngilaa.
- Politiit tamanna susassaqarfiginngilaat. Pinngortitamut tunngasunut ingerlatsisut tamanna akisussaaffigaat, Kalaallit Nunaanni Politiini unnerluussisuuneq, Morten Nielsen oqarpoq, nannulli illoqarfinnut pigaangata politiit iliuuseqartartut erseqqissaatigalugu.
- Nannut ulorianartorsiortitsippata ajunaartoqarnissaa pinngitsoortinniarlugu politiit soorunami iliuuseqartarput, pisariaqaraangallu nanup toqunnissaanut ikioqataallutik. Namminersorlutik Oqartussalli nakkutilliineq suliassarivaat, Morten Nielsen oqarpoq.
Aamma atuaruk Nanunimmat kommuni eqqakkanut aaqqiissuteqarnialerpoq
Aalisarnermut, piniarnermut nunalerinermullu naalakkersuisup, Karl-Kristian Krusep maanna ajornartorsiut qanoq aaqqiiviginiarnerlugu akisinnaanngikkallarpaa.
- Pisasseeqqinnikuunngilagut. Taamaattorli nannut illoqarfinni takkuttarneranni toqunneqarsinnaaneranik malitassat malinneqarlutik toqunneqartartussaassapput.
Aamma atuaruk Nannut Ittoqqortoormiit illoqarfiannut pisartut amerlapput
Nannullu illoqarfimmukartarnerinut suna pissutaanersoq misissorluaqqaarlugu ajornartorsiut qanoq aaqqiivigineqarnissaa aalajangerneqarumaartoq, Karl-Kristian Kruse oqarpoq.
- WWF-ip iliuuseqaqattaarneri uagut akuleruffigissanngilagut, pissutigalugu uagutsinnut attaveqarnikuunngilaq, aamma paasiniaaffiginikuugaluarparput, kisiannili akissuteqarnikuunani. Taamaammat, naalakkersuinikkut atuutitagut, aammalu pisassiisarnerit, ingerlaartitsinerlu uagut nalilersugassarivavut. Massakkut ajornartorsiut alliartortoq qanoq allanngortissinnaaneripput, aalisarnermut, piniarnermut nunalerinermullu naalakkersuisoq Karl-Kristian Kruse oqarpoq.