WWF-ip anisitaanera Norgep kissaatigisimanngilaa
Nannut pillugit ataatsimiinnerup matoqqasuunissaa Norgep kissaatigisarinngilaa, tamannami Norgemi ileqquunngikkaluarpoq, Erik Solheim oqarpoq.
- Pinngortitamik illersuiniartut tusagassiorfiillu ataatsimiinnermit mattunnianngikkaluarpagut, peqataatinneqannginnissaalli isumaqatigiissutigisinnaasimavarput, Erik Solheim NTB-mut oqarpoq.
Pinngortitamik illersuisut suliniaqatigiiffiillu allat ataatsimiinnermi peqataatinneqannginnerat Kalaallit piumasarigaat, pinngortitaq pillugu nunarsuaq tamakkerlugu suliniaqatigiiffimmit, WWF-imit, oqaatigineqarpoq.
Tamannalu Canadamiunit tapersersorneqartoq NTB-mi allaaserineqarpoq.
WWF-ip ataatsimiinnermit anisitaasimaneranik oqalunneq kalaallit aallartitaasa aqutsisuata Amalie Jessenip eqqortuunnginnerarpaa.
- Ataatsimiinnerni suleriaatsit aallaavigalugit aalajangerneruvoq Amalie Jessen oqarpoq.
- Nannut nungusaataanngitsumik piniarneqarnerisa nunat allat suleqatigalugit ingerlanneqarnissaa Kalaallit Nunaata suleqataaffigerusuppaa, Amalie Jessen oqarpoq.
Nannut Kalaallit Nunaanni pisassiissutigineqartartut ukiuni kingullerni ikiliartortut, Amalie Jessenip erseqqissarpaa.
