Wuhanimi napparsimmavissuup pisortaa coronavirusimik toqquteqartoq
Kinami illoqarfissuup Wuhanip millionilikkaanik inullip napparsimmavissuani pisortaq, nualluummik coronavirusimik tunillanneqareernermi kingorna toquvoq.
Kinami naalagaaffiup tv-qarfissua marlunngornermi ullaap tungaani taama paasissutissiivoq.
Liu Zhiming Wuhanip napparsimmavissuisa pingaarnersaanni annersaannilu Wuchang Hospitalimi pisortaasimavoq. Kinap nalunaaqutaa malillugu marlunngornermi ullaap tungaani toquvoq.
Taanna Kinami nakorsani nuimasuni corunavirusimik tuniluuttumik toqquteqartuni tulliuvoq.
Nakorsaq alla, Li Wenliang, qaammatip matuma aallartinnerani toquvoq. Taanna nualluutip tuniluunneranik aarlerisaarinini pillugu Kinami aqutsisunit assuaritissimavoq.
Li Wenliang ilumut toqusimanersoq qularutigineqaqqaarneratulli napparsimmavissuarmi pisortaq ilumut toqusimanersoq ataasinngornermi unnukkut qularutigineqarpoq.
Liu Zhimging toqusimasoq, Kinami aqutsisut kommunistiusut ataasinngornermi unnukkut nalunaarutigaat, uumasorli kingorna aamma nalunaarutigalugu.
Pisortap toqunera Kinami naalagaaffiup TV-qarfissuata pisortatigoortumik nalunaarutigereeraalu tamanna aqutsisunit pisortatigoortumik uppernarsarneqanngilaq.
AAMMA ATUARUK Kinami peqqinnissaqarfimmi sulisut 1716-it nualluummik nutaamik tunillatsissimasut
Nualluut coronavirusi Wuhanimit Kinami nunap immikkoortuani Hubeimiittumit tuniluuppoq.
Nualluutip tuniluunnerunissaa pinngitsoortinniarlugu illoqarfiup inuisa 11 millioniusut sunnertissutigisaannik Wuhan matuneqarpoq.
Peqqinnissaqarfimmi sulisut 10.000-likkaat nualluutip tuniluunnerunnginnissaa sulissutigaat.
Kinami coronavirusimik decembarimili toqquteqartut maannamut 1800-nit amerlanerupput. Kinamilu inuit nualluummik taassuminnga piffissap taassuma iluani tunillatsissimasut maannamut 72.400-nit amerlanerupput.
Nualluut taanna Kinamit tuniluuppoq, nunanilu allani 20-nit amerlanerusuni tunillatsissimasunik aamma siumuisoqarluni.
Nualluummut coronavirusimut, nunat tamalaat peqqissutsimut suleqatigiiffiata, WHO-p, Covid-19-imik taasaanik nappaateqalersutaasinnaasumut akiuussutissamik suli pilersitsisoqanngilaq.
Nappaat taanna qanoq navianartiginersoq erseqqissumik oqaatigineqarsinnaanngikkallarpoq.
Inuilli coronavirusimik toqquteqartartut annersaartuutitigut nappaatinik allanik toqquteqartartunit ikinnerussangatinneqarput.
