WTO-p aalajangiinera Genevemi tusarniaassutigineqalersoq

Nunat tamalaat niueqatigiinnikkut suleqatigiiffiata, WTO-p, puisit amiinik tunisassiat pillugit aalajangiinera pillugu Canadap Norgillu eqqartuussivimmut suliassanngortippaat. Naggueqatigiit Inuit puisit amiinik tunisassiaannik immikkut akueralugit EU-p eqqussisinnaatitaanera, WTO-p atorunnaarsimmagu eqqartuussivimmut suliassanngortinneqarpoq.

Tamannarpiaq pillugu sapaatip-akunnerani matumani Genevemi tusarniaasoqarpoq. Canadami avatangiisinut ministerip, Leona Aglukkap, Canadami issittumilu tamarmi puisinniartartut tapersersorpai, puisinniarneq tamaani aningaasarsiornermut pingaaruteqartuaannarsimammat.

Akilinermi naggueqatigiit Inuit suleqatigiiffianni ITK-mi siulittaasup, Terry Aallap, EU-p eqqusseqqusinnginnera "EU-p politikkikkut ileqqorissaarnikkullu pissaanerminik atornerluineratut" taavaa, tassami puisinniarnerup nungusaataannginnera uppernarsineqareeraluarmat.

Akilinermi ICC-p siulittaasuata, Duane Smithip, oqaatigaa WTO-p aalajangiinera ileqqorissaarnerunngitsoq, inatsisinik unioqqutitsinerusoq pisuusaarnerusorlu, aamma Naalagaaffiit Peqatigiit nunap inoqqaavisa pisinnaatitaaffii pillugit aalajangersagaanut unioqqutitsinerusoq.

Ilinniartut kalaalersallit Ottawami inatsisartut ataatsimiittarfiata silataani ippassaani marlunngornermi akerliussutsimik takutitsipput, qitillutik, erinarsorlutik puisip amiinillu atisalianik takutitsillutik. Taamaaliornermikkut puisinniartartut tapersersorpaat, Genevemilu tusarniaanissaq malunnartinniarsaralugu.