WSPA Kalaallit Nunaannut utoqqatserpoq
Siullermik: WSPA-mit saqqummiussaq sakkortuumik IWC-p siulittaasoqarfianut naammagittaalliuutigaarput pisortatigoortumik uppernarsaataanngimmat, Leif Fontaine Chilimiit allappoq.
Aappassaanik: KNAPK-p WSPA-p quppersagaliaanut illuatungiliinera malunnartumik ataatsimeeqataasunit tusaatissatut tigulluarneqarpoq.
Ippassaq WSPA-t allakkat pisortatigoortut Nunatta Danmarkillu sinniisaannut tunniuppaat utoqqatsernermik imaqartut. Ataatsimeersuarnermi WSPA-p saqqummiussai eqqartorneqanngivipput uagutsinnut qujanaqisumik, Leif Fontaine emalikkut allappoq.
-Ippassaq nunarput arfattassanik kissaatiminik saqqummiimmat seqersittakkakkut, tassani saqqumiunneqarlutik ilisimatuussutsikkut tunngaviit, neqit pisariaqartinneqarnerinut tunngavilersuutinut tunngasut, nunarput assut nersualaarneqarpoq paattaanneqarluarlunilu. Leif Fontaine KNAPK sinnerlugu isumaqatiginninniaqataasoq allappoq.
Piumasavut neqit 730 tons EU-mit akuersaarumaneqanngivipput. Tamannalu imatut paasisariaqarluni: pissutsit taamaatsillugit nunatta piumasai ilaasortanit amerlanerussuteqartunit akuersaarneqanngitsut. Taamaattumik suli taasisitsinissamik piumasaqanngilagut. EU-lu isumaqatigiinniarnerit arfanniat ikinngutivut suleqatigalugit ingerlappavut, Leif Fontaine allappoq.
Tikaagulliusaat 19-it qipoqqaat qulit arfiviillu marluk ilisimatuuniit innersuussutigineqarput, tassa neqit 730 tonsinit appasinnerusut maannakkut anguniartariaqalerlugit Leif Fontaine Chilimiit allappoq.
