Nunatsinni qarasaasiatigut serlersaarineq: Windowsillit nutarterilik

Nunarsuarmi qarasaasiakkut serlersaarineq nunatsinnut annguppoq.

Suliffeqarfiit inuillu qarasaasiaat millionit affai pallisimasut sapaatip akunnerata naanerani serlersaarneqarput.

Nunatsinni ikinnerpaamik ataaseq

- Qallunaat nunaanni qarasasiaatigut attaveqatigiinnerup qularnaatsuunissanut oqartusaqqarfimmit nalunaarutigineqarpoq aamma nunatsinni sapaatip akunnerata naanerani qarasaasianut serlersaarisoqalersimasoq, Inu:it-mi siunnersortaaneq Bo Østerberg Kristensen oqarpoq.

Virusip, WannaCry ransomwaremik taaguutillip, qarasaasiat Microsoftimeersunik programmillit unioqqutitsillutik serlersaarpai, ullullu ikittunnguit ingerlanerinnaanni nunarsuarmi tamarmi qarasaasiat 400.000-it missaat ajoquserlugit. 

Nunatsinni eqqugaasut amerlavallaanngikkaluartut amerleriarsinnaasut, inu:it ilisimatitsivoq.

- Inu:it-miit sullitatsinnik serlersaarfigitissimasumik suli nalunaartoqanngikkallarpoq. Oqarninnut nalunaartoqanngikkallartoq pissutaavoq, ullumi, aqagu aqaguaguluunniit suli serlersaarfigitittoqariaannaammat.

Toqqortat tillinneqarsinnaasut

Taamatut qarasaasianut unioqqutitsilluni serlersaarinermit eqqugaasut ilagaat tuluit nunaanni napparsimmavissuaq, Koreap Kujasissuani filmertarfissuit Ruslandimilu ministereqarfiit. Uaguttaaq eqqugaasinnaavugut.

- Qarasaasiaqarpusi inuttut ilissi pigisassinnik imalinnik, assit, allagarsiat, allagaatit immaqalu aamma suliat ilinniakkamut tunngassut, qarasaasiavit serlersaarneqarnerata kingunerisaanik 2.000 koruuninik akileeqqaarlutit toqqortatit aatsaat uterteqqissinnaavatit, Bo Østerberg Kristensen oqarpoq.

Qarasaasianut unioqqutitsilluni pulasoqaraangat qanoq annanniartoqarsinnaaneranik suli periusissiamik nassaartoqanngitsoq inu:it erseqqissaavoq.

- Marlunnik periafissaqarpoq; qarasaasiavit nammineq toqqorsiviani imaasa assinginik sillimmateqarsinaavutit, taakkualu ikkussuuteqqissinnaavatit, taamaanngippat annaassavatit.

Windowsimik nutarterisoqassasoq

Windowsinut atuisut nalusaminnit mailisianik ammannginnissaat linkinillu ammaannginnissaat, siunnersortaanerup kaammattuutigaa.

- Kikkulluuniit Windowsimik nutarterisinnaapput, akeqanngilaq, inu:it-mi siunnersortaaneq Bo Østerberg Kristensen oqarpoq.

Virusinut illersuutit nutartertarnissaat Tele-Postimiit innersuussutigineqarpoq.

Namminersorlutik Oqartussani Digitalimik Sullissinermut Aqutsisoqarfik eqqugaanngitsoq, aqutsisoqarfiup KNR-imut ilisimatitsissutigaa, oqaatigalugulu qarasaasiatik nutartereersimagitik.