WikiLeaks Islandimi nalunaarsugaalerpoq
Paasissutissanik katersuinermut imaluunniitt aningasanik katersinermut suliffeqarfik atorsinnaasoq eqqarsaatigineqarpoq, taama nalunaarpoq WikiLeaksip Islandimi oqaaseqartartua, Kristinn Hafnarsson.
- Nunarsuatsinni tamarmi WikiLeaksip takussaanissaa kissaatigaarput, Islandimi suliffeqarfeqarnissarput siunertamut aamma ilaalluni, suliffeqarfik nutaaq pillugu Hafnarsson oqarpoq. Suliffeqarfik nutaaq taaguuteqarpoq Sunshine Press Productions-imik.
Inatsisit toqqammavigalugit aatsaat siullermeersumik WikiLeaks suliffeqarfinngorsorineqarpoq. Taamaattorli WikiLeaksip nittartagaa suli Sverige-miilluni.
Irakimi Afghanistanimilu sorsunneq pillugu isertugaatinik tusind-ilikkaanik internetikkut saqqummersitsisutut, ukioq manna WikiLeaks nunarsuatsinni tamarmi ilisimaneqalerpoq.
Isertugaatinik saqqummersitsinerup kingorna WikiLeaksimut attuumassutillit inuit uumisaarneqartarsimallutillu ilungersunartorsiortinneqartarsimapput.
WikiLeaksip aallarniisua, australiamiuusoq Julian Assange, sapaatip akunnera kingulleq oqarpoq, Schweizimi qimaasutut nunasiniarluni nittartagarlu tassani angerlarsimaffeqalersinniarlugu.