WHO-p coronavirusip tuniluunnerulernissaata akiornissaanut periarfissaqarsorigaa
Kinap coronavirusip tuniluuterujussuarnissaa akiorniarlugu iliuuseqalertupallannera iluaqutaarpasippoq.
Taamaattumillu nunat tamalaat coronavirusip tuniluunnerunissaata akiornissaanut iliuuseqarnissaminnut periarfissaqartut, nunat tamalaat akornanni peqqinnissaq pillugu suliniaqatigiiffimmi, WHO-mi, qullersaq isumaqarpoq.
WHO-mi qullersap, Tedros Ghebreyesusip, Kinap killeqarfinnik matusineranut, angallannernik killiliineranut ilaatigullu Kinami nunap immikkoortuani Hubeimi - coronavirusip siaruaaffianeersumi - inuuttaasut aninissaannut inerteqquteqarneranut nersualaarpaa.
Coronavirusimik tunillatsissimasut 99 procentii Kinamiipput.
Tunillatsissimasullu allat Kinap avataaniittut 176-iinnaasut, WHO-mi qullersap erseqqissaatigaa.
Nunat pisuut kalerriisarnissaat pingaaruteqartoq
- Imaanngilarli pissutsit ajornerulernavianngitsut, Ghebreyesus oqarpoq.
- Qularnanngivissumillu iliuuseqarnissatsinnut periarfissaqarpugut, periarfissarpullu maangaannartinnagu atorluarniartigu, Ghebreyesus oqarpoq.
Nunanilli coronavirusimik tunillatsissimasunik siumugaqarfiusimasut kalerriisarnissaat pingaaruteqartoq, WHO-mit aamma erseqqissaatigineqarpoq.
Ingammillu nunat pisuut kalerriisarnissartik eqqaamasariaqarpaat, Ghebreyesus oqarpoq.
- Coronavirusip qanoq tuniluutsigineranik kalerrinneqanngikkaangatta tamanna qanoq kinguneqarsinnaanersoq nalileruminaatsittorujussuusarparput, sapinngisamillu naleqqunnerpaamik peqqussuteqarnissarput qulakkeerumallugu kalerriisarnissaat pingaaruteqarpoq, Ghebreyesus oqarpoq.
