WHO-p Beijingimi coronavirusip tuniluutileqqissimanera ernummatigigaa

Kinap illoqarfiisa pingaarnersaanni Beijingimi coronavirusimik tunillatsittut sapaatit akunnerata ingerlanerani 100-nit sinneqartut paasineqarput.

Beijingimi coronavirusip tuniluutileqqinneranik tamanna takussutissaasoq Naalagaaffiit Peqatigiit peqqissuunissaq pillugu suleqatigiiffiata, WHO-p, ataasinngornermi nalunaarutigaa.

Tunillatsissimasut nutaat illoqarfissuup ilaani Xinfadimi nerisassanik niuffaffimmut atassuteqarput, illoqarfiullu ilaa tuniluuttoqaqqilerani matuneqarpoq. Timersortarfiit kulturikkullu pikialaarfiit matuneqarlutik.

Matumiit matumut kasuttoqattaarluni misissuisoqassasoq

Najugaqartunut kissarnersiuinerit amerlanerulissasut, ilinniartullu piumagunik angerlarsimaannarlutik ilinniartinneqarsinnaalissasut Beijingimi atorfilittat ilaat Xu Ying ataasinngornermi tusagassiortunik katersortitsinermi oqarpoq.

Nerisassanik niuffaffimmiissimasut 8000-nit ikinnerunngitsut tunillatsissimanersut misissorneqarsimalerput, inuillu 200.000 missaanniittut maajip 30-ata kingorna niuffaffimmiissimassasut naatsorsuutigineqarpoq. Beijingimi tunillatsissimasinnaasut maanna misissorniarneqarput, ilaatigut matumiit matumut kasuttoqattaarluni misissuisoqarluni.