WHO: Nunarsuarmi inuit kuppillammik tunillanneqarsimasut 41.000-t sinneraat
Nunarsuarmi inuit kuppillammik tunillanneqarsimasut katillutik 41.000-sut, taakkunanngalu maannamut aqqaneq marluk nappaammik taassuminnga toqquteqarsimasut, nunat tamalaat peqqinnissamut suliniaqatigiiffissuat WHO ippassaq sisamanngornermi nalunaarpoq.
Kuppillak nunarsuaq tamakkerlugu tuniluuppallaarunnaaraluartoq nunani arlalinni soorlu Amerika Avannarlermi Amerika Kujallermilu tunillanneqarsimasut amerliartupiloortut nunarsuarlu tamakkerlugu kuppillammik tunillanneqarsimasut pingajorarterutaasa missaat amerikamiuusut, WHO nalunaarpoq.
AAMMA ATUARUK Nakorsaaneq aapakaat kuppiat pillugit: Amerlanerusut tunillanneqassapput
Kuppillammut akiuussutissaalatsisoqarnera peqqutaalluni nunani assigiinngitsorpassuarni, aamma USA-mi, inuit nappaammut tassunga akiuussuserneqarsimasut amerlaneruniassammata taakkunani kuppillammut akiuussutissat annertussusilerneqarnerat millineqarput.
Danmarkimilu nakorsaatiliorfiup akiuussutissaliorfiullu, Bavarian Nordicip, tassa kuppillammut akiuussutissatut atorneqarsinnaasutut akuerisamik kisimi akiuussutissaliortartup, taamaaliortoqarnera apeqquserppaa.
WHO-mi siunnersuisut kuppillammut akiuussutissanik ilisimatusarnermi paasisat naliliiffiginiarlugit oktobarip aallartinnerani ataatsimiissapput.