Coronavirusip allannguutaata Omikronip, assersuutigalugu coronavirusip allannguutaanut Deltamut naleqqiullugu tuniluutianerusup, akiuussuserneqarsimasut napparsimaruluppallaartannginnerannut pissutaaqataasoq, misissuinerit arlallit takutippaat.Assi: Edgard Garrido/Reuters/Ritzau Scanpix

WHO: Omikron coronavirusip Europami tuniluukkunnaariartorneranut pissutaaqataasinnaavoq

Europami innuttaasut akornanni quliugaangata arfinillit ukioq manna marsiutinnagu coronavirusimik tunillatsissimasinnaassapput. Nunarsuaq tamakkerlugu inuit napparsimareernermi kingorna tunillanneqarsinnaannginnermik taassuma kingorna angusaqassasut WHO-p siulittuutigaa.

Coronavirusip allannguutaata Omikronip coronap nunarsuaq tamakkerlugu tuniluunneranut sunniuteqangatsiarpoq, coronallu assersuutigalugu Europami tuniluukkunnaariartorneranik kinguneqarsinnaalluni.

Naalagaaffiit Peqatigiit peqqissuunissaq pillugu suleqatigiiffiata WHO-p Europami allattoqarfiata pisortaa Hans Kluge, nutaarsiassaqartitsivimmut AFP-mut sapaammui taama oqarpoq.

- Omikronip coronap Europami tuniluukkunnaariartorsinnaanissaanut pissutaasinnaanera ilimanarpoq, Kluge oqarpoq.

Europami innuttaasut 60 procentii marsip qaammataanngortinnagu tunillanneqarsinnaasut ilanngullugu oqaatigaa.

Omikronip Europami tuniluutilertoqqaarnera annikilliartulernerata kinguneranik ulluinnatsinnut sunniuteqarunnaariartorsinnaanera sapaatit-akunneri arlallit qaammatilluunniit qaangiuppata aatsaat nunarsuaq tamakkerlugu malugineqarsinnaanisssaa ilimanartoq, taanna oqarpoq:

- Akiuussutissat pissutaasinnaapput, inuilluunniit napparsimareerlutik tunillanneqarsinnaannginnermik angusaqarnerat pissutaasinnaavoq, Hans Kluge oqarpoq.

Uissuumminartumik suli pisoqarsinnaasoq

Sila kiannerulerpat coronavirus tuniluuppallaarunnaariartorsinnaasoq ilanngullugu oqaatigaa:

- Coronavirus ataatsimut isigalugu tuniluuppallaarunnaarallassasoq ilimagaarput, ukiullu naalernerani tuniluutilertoqqilersinnaassagunarluni, Kluge oqarpoq.

Coronavirusip allannguutaata Omikronip, assersuutigalugu coronavirusip allannguutaanut Deltamut naleqqiullugu tuniluutianerusup, akiuussuserneqarsimasut napparsimaruluppallaartannginnerannut pissutaaqataasoq, misissuinerit arlallit takutippaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl