WHO: Inuusuttuaqqat pualavallaarput

Taakkunannga kalaallit inuusuttuaqqat 2.500-t atugaat misissorneqarput ilaatigut sammineqarluni ”pualaneq”.

Nalunaarusiaq najoqqutaralugu kalaallit meerartaat ilaatigut sodavand-itorpallaarnertik pissutigalugu pualavallaartutut oqaatigineqarput.

Nunat tamalaat misissuivigineqarneranni kalaallinut tunngasortaanut nakorsaq Birgit Niclasen misissuisuuvoq, kalaallillu pualavallaarnerat ima nassuiarpaa.

- Kalaallit meerartaat pualavallaalersimapput aamma inersimasortaat pualavallaarput. Tamannalu peqquteqarpoq ullumikkut atugassarititaasut siornatigumut naleqqillugit allanngorsimanerannik, timikkullu suliniuteqarneq siornatigumut naleqqiullugu annikillisimammat. Tassalu taannarpiaavoq suliniutigineqartussaq, tassami imaappoq pualaneq kisiat eqqarsaatigivallaarnagu timip aalatinnissaanut puallarnanngitsunillu nerisaqarnissamut iliuuseqarniarsarinissaq eqqarsaatiginerusariaqarpoq, nakorsaq Birgit Niclasen taama oqarpoq.

Taassumali oqaatigaa nalunaarusiap avataatigut erseqqisaatigerusukkini kalaallit timimikkut inunnguutsiminnik ilusaat pualasuutut nalileruminartuummat tassa kalaallit timimikkut ilusaat sillaarissooreersuummat.

- Uanga nammineq naliliissaguma kalaallit silissusaasa 25 procentia inunnguutsiminngaannersuuvoq tassa timip kingornussaanut ilaasuulluni 75 procentialu inooriaatsimik allannguinerusariaqarnermik tunngaveqarpoq.