Suliniut Sermersuarmi nillissutsimik uuttuiniarnermik ajornaannerulersitsissasoq
![](/sites/default/files/styles/image_934x467/public/article_images/indlandsis_terry_feuerborn_flickr.jpg?itok=tjBVAgLl)
Atortorissaarutit nutaat sermip nikerarnera sermersuullu silap pissusiata allanngoriartorneranut qanoq sunnerneqartarneranik ilisimaqarnerulernermut iluaqutaassapput.
Ilisimatooq William Cogan qillerutinik nutaanik suliaqarnissami siuttuuvoq:
- Sermersuup naqqata qanoq nillissusiata paasinissaa sermip nikerarneranik allanngorarneranillu naatsorsuisarnitta eqqorluarnerunissaannut pingaaruteqartorujussuupput, silallu pissusiata allanngoriartornerata sunniutigisartagaanik paasisimasaqarnerutilissalluta, GEUS-ip nittartagaani allappoq.
Ilisimatuut taamaallaat sermersuup qeqqata naqqani nillissutsimik sumiiffinni assigiinngitsuni arfinilinni ukiuni kingullerni 60-ini uuttortaasimapput. Uuttortaanerit silap pissusiata avatangiisillu misissorneqarneranni sermimi itisuumik qillerinermi pipput. Qillerinermi maskiinat atorlugit sermiminermik peersisoqartarpoq, qillerinerilli naammassiniarnerat qaammatinik arlalinnik ilaatigullu ukiunik sivisussuseqarsinnaasarpoq.
Suliniummi nutaami, HOTROD-imik atserneqartumi qillerut aatsitsissut innaallagiatortoq sukkanerusoq Sermersuullu naqqanut qillereriarluni nillissutsimik uuttuisinnaasoq sananeqassaaq.
Qillerut nutaaq sikumik aatsitsisinnaasoq, kiassaatip kissattaataanik nuuatigut atortulik sermikkut ammukarsinnaassaaq nillissutsimillu uuttuummik aamma atortorissaaruteqassalluni.
GEUS naapertorlugu 500 meterisut ititigisumut ullunik qulinik sivisunerunngitsumik qillereriarluni, tassanngaanniit Sermersuup naqqani nillissutsimik uuttuinissaq HOTROD-imi anguniagaavoq.
Suliniut VILLUM Experimentimit taperserneqarpoq.