Webavisen.gl ukiup naanerani matussaaq
Nunatsinni inuit internetimut attavillit qularnanngitsumik amerlanersaasa, internetimut adresse webavisen.gl internetimut isertarfimminni allassimassavaat.
Tassami internetikkut aviisi 2004-mili saqqummersinneqarmalli, nittartakkamik pilersitsisoq Nunatsinni nutaarsiassanik pingaarutilinnik pingaaruteqannginnerusunillu ingerlatitseqqittuartarmat, tamannali oqaluttuaannanngulerpoq.
Tassami nittartagaq taanna ukiup naanerani matuneqartussanngorpoq aamma akisussaalluni aaqqissuisup piginnittullu Bjarne Hansenip sooq matusussanngornertik tunngavilersunngilaa, erseqqissarluguli webavisen.gl qaqugorsuarmut atasussatut eqqarsaatigineqarsimanngisaannarmat.
Ukiut arfiniliinnaat matuma siornatigumut naleqqiullugu qujanartumik Nunatsinni ullutsinni amerlanerusunik internetikkut nutaarsiassaqartitsisoqalernera, akisussaalluni aaqqissuisup maluginiarpaa.
