Washingtonimi inussuk

USA-mi illoqarfiit pingaarnersaanni, Washingtonimi innuttaasut qanittukkut inussummik ilumoortumik takusaqarsinnaalissapput - inussuk naggueqatitta Akilinermiut ilisarnaatitut atorpaat.
Allattoq Jaaku Lyberth
apriilip 12-at 2010 06:21

Peter Irniq, siornatigut Nunavummi kommissæriusoq, sapaatip akunnerani matumani Washingtonimi inussuliussaaq, inussuk taanna Canadami ministeriunerup Stephen Harperip inniminnigaraa.

Harperip inussuk Canadap pisortatigoortumik kattuffimmut OAS-imut tunissutiginiarpaa, kattuffik taanna tassaavoq Amerikami Avannarlermi, Qiterlermi Kujallermilu naalagaaffiit kattuffiat. OAS ukiormanna ukiunik 100-nngortorsiorpoq, inussullu tunissutigineqartussaq, kattuffiup allaffeqarfiata Washingtonimi aqqusernit ilisimaneqarnerpaaffianniittup silataaniissaaq, taannalu Amerikami præsidentip illorsuanut, Det Hvide Husimut ungasinngitsumiippoq.

Peter Irniq Nunavummi ukiorpassuarni naggueqatigiinnut Inunnut siuttuuvoq, soraarninngornerminilu kusanartorsuarnik inussuliorneq aallutaralugu, inussullu tunissutigineqartussaq takornarianit Washingtonimiunillu kusagalu qimerloorneqarsinnaassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq