Wæverip Siumup siuariarnera tulluusimaarutigaa
Jørgen Wæver Johansenip Kommune Kujallermi ukiuni sisamani borgmesterioreerluni issiavini Kiista P. Isaksenimut tunniuttussanngorpaa.
Kommune Kujallerlu arnamik maanna borgmesterinngortitsisinnaammat, tamanna tulluusimaarutissaasoq, Wæver isumaqarpoq.
- Isumaqarpunga tulluusimaarutigissagipput maani kujataani aamma arnamik siuttoqalernissarput. Soorunami angusarissaarnerusimasinnaanissara neriuutigisimagaluarpara, Kommune Kujallermi borgmeseriujunnaartoq, Jørgen Wæver Johansen, oqarpoq.
AAMMA ATUARUK Isaksenip Kujallermi suleqatigiinnissaq kissaatigaa
Wæver: Ajorsanngilanga
- Ajorsanngilanga, Siumumi ajugaaqataavunga. Siuariarpugut nunatsinnilu Siumoqarfiit annersarilerpaatigut. 56 procentinit qinerneqarpugut, imaappoq piumagutta allanilluunniit suleqartariaqanngilagut kommuni manna ingerlatissallugu.
Jørgen Wæver Johansenip kommunip aningaasaqarnikkut ingerlanerlulluni Namminersorlutik Oqartussanit siorna nakkutigineqarunnaarsimasoq eqqaavaa.
- Tulluusimaarutigeqaara kommuni aningaasarsiornikkut aningaasaqarnikkullu aqullaaqqasoq maannakkut killormorluinnaq inissisimalluta qineqqusaarsinnaagatta, Jørgen Wæver Johansen oqarpoq.
Kommuninut qinersinngitsiartugut Meeqqat Illersuisuata Kommune Kujalliup meeqqanik inuusuttunillu isumaginninnera nalunaarusiamini sakkortuumik isornartorsiorpaa.
Jørgen Wæver Johansenip namminersortutut sulinissani maanna aallunniarlugu, KNR-imut oqaluttuarpoq.