VW-nik tuniniaasoq: Aamma Nunatsinni peqarnissaa ilimanarsinnaavoq

Biililiorfissuup Volkswagenip biilini 11 millionini avatangiisinik mingutsitsinermik uuttortaanermut qarasaasiatigut atortunik allanngortiteraluni peqquserlussimanera qulaajarneqareersoq, amerikamiut marluk aalajangerput tyskit biililiorfissuat eqqartuussivimmut suliassanngortinniarlugu, Tuluit Nunaanni nutaarsiassaqartitsivik Sky News taama allaaserisaqarpoq.
Allattoq Karsten Sommer
septembarip 23-at 2015 10:58
Nutserisoq Simon Uldum -

Amerikamiut eqqartuussissuserisuata, Robert Cliffordip, oqaatigaa biilit neriorsuutigineqartutut avatangiisinik qajassuussinnginnerat ilisimasuugunikku sullitami pisiarisimassanngikkaluaraat, aamma mamianartuliornerup kingunerisaanik biilit nalikillinissaat ilimanarsinnaasoq erseqqissaatigaa.

Volkswagenit dieselitortut arlalissuit Nunatsinni aamma tunineqarsimapput, Nunatsinnilu VW-nik eqqussuisup Nuuks Autop KNR-imut uppernarsarpaa biilinik qarasaasiatigut atortunik allanngortiteriffigineqarsimasunik Nunatsinni aamma angalasoqarnissaa ilimanarsinnaasoq.

- Kisianni suli ilisimasaqaqqissaanngilagut, Nuuks Automi pisortaq Jimmy Holm Jensen taama oqarpoq.

- Danmarkimi pilersuisutsinnit paasissutissanik tunineqarnissarput utaqqivarput. Qarasaasiallu atortuinik allanngortitsinissamik peqqusisoqassappat soorunami taamaaliorumaarpugut, Jimmy Holm Jensen KNR-imut taama oqarpoq.

Amerikami Avatangiisinik Misissuisoqarfiup, EPA-p, Volkswagenip 100 milliardit koruunit sinnerlugit akiligassinneqarsinnaaneranik sioorasaarivoq.

Peqquserluttoqarsimaneranik USA-mi pisuutitsisoqareernerata kingorna Volkswagenip aktiaataasa nalingi Tysklandimi børsimi ippassaq aamma 15,3 procentinik nalikillipput.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq