Arsaattartoq meeqqanut innarluutilinnut millioninik tunissuteqartoq
Franskit isikkamik arsaallutik nunanut allanut unammisartui VM-ertoqarnerani ajugaagamik nersorneqaannanngillat. Arsaattartummi aamma 3,3 millionit koruunit missaannik nalilimmik bonusisipput.
Allattoq Ritzau
juulip 17-at 2018 13:02
Nutserisoq Ivik Kristiansen
Kylian Mbappelli bonusisiani peqatigiiffimmut Premiers de Cordeemut tunissugitigai.
Arsaattartoq siukkaq peqatigiiffimmut, meeqqat innarluutilinnik timersortarnissaannik ikiuinissamik sulissuteqartumut ambassadøriuvoq.
- Kylian inuuvoq nuannersoq. Pilersaaruteqanngikkaangat suleqatigissalluta iluaraa. Meeqqat ajunngitsorujussuarmik pisarpai, oqaatsillu eqqortut atorlugit qiimmassartarlugit, peqatigiiffiup siulittaasua, Sebastien Ruffin oqarpoq.
Paris Saint-Germainip saassussisua VM-imi sisamariarluni isertitsivoq, ilaatigut ajugaanniutivinnermi Franskit Kroatiamut 4-2-mik ajugaaneranni isertitsilluni.
Mbappe VM-imi arsaattartut inuusuttortaanni pikkorinnerpaattut ajugaanniutivittoqareernerani toqqarneqarpoq.
