VM naggataarmat qaartartumeerisoqangajattoq
Aasaq manna Tysklandimi nunarsuarmi pissartanngorniulluni arsaattut naggataarmata qimuttuitsuni qaartitsisoqartussaasimagaluarpoq.
Pinerliinialli isumanerluuteqalerput, taamaalillutillu Jyllandspostenip Muuamaat quujassuaatigalugu titartartitaannut mamiatsassimanertik pillugu qaartitsilersaarnertik kinguartiinnarsimallugu.
Saassussinissaraluaq pinerliinianit juulip naalerneranut kinguartinneqarsimavoq, kuffertilli marluk qaartartunik imallit Tyskit qimuttuitsuinut ikineqarsimagaluartut teknikkikkut kukkusoqarsimanera pissutigalugu qaanngitsoorsimapput.
Pasineqartup aappaa Tysklandimi qimuttuitsut unittarfiani filmiuliuummik nakkutilliissummik terlinganiit filmiliarineqarsimavoq. Taassuma kufferti qaartartumik imalik qimuttuitsumut ikigaa filmiliami takuneqarsinnaasimavoq.
Pinerliiniaqataasuttaaq allat sisamat Libanon-imi aamma tigusarineqarsimapput.
Tyskit politiivi isumaqaqqaarsimagaluarput, pinerliiniat taama qaartitsilersaarnerannut Israelimiut Hezbollah-kkullu aaqqiagiinnginnerat patsisigalugu taama iliulersaarsimasut. Killisiuinermili paasinarsisimavoq, ukioq danskit aviisiata Jyllandspostenip aammalu kingorna tyskit aviisiini saqqummiunneqartut muuamaat quujassuaatigalugu titartakkat mamiasuutigisimagaat taamalu tamanna pillugu akiniaanialersaarsimallutik.
