VM: Angutimmarik Kreutzmann aappassaa toqqagaavoq

Kalaallit angutit assammik arsartartui nunarsuaq tamakkerlugu pissartanngorniulluni unamminerminni siullerpaamik ullumi ajugaapput.

Kalaallit 34-eraartut australiamiut 25-eraarput.

Angutimmarik Kreutzmann Maniitsumeersoq VM-ertoqarnerani aappassaa unamminermi arsallammattut toqqarneqarpoq, unamminermi uani 15-inik isertitaqarluni. Taanna toqqarneqarnerminut ima oqaaseqarpoq:

- Toqqagaanera ajunngitsorujussuuvoq, pisinnaasara tamaat unammeriaratta ajunngeqaaq, misigisaq nuanneqaaq, ilimaginngikkaluarparali marloriarlunga toqqagaanissara.

Kalaallit sungiusaasuat Jakob Andreasen unamminermi ajugaanertik tulluusimaarutigeqalugu ima oqaaseqarpoq:

-Unamminerput iluarisimaaqaarput, ajugaanerpullu nuannaarutigeqalugu. Kalaallit VM-inut peqataasarnerata oqaluttuarisaanerani aappassaa unamminerni ajugaavoq. Oqarsinnaavungalu

unammisartuutigut pissanganarluinnartuusut, inuusuttuarannguugaluarlutik unammisaminnut ajugaapput.

Tupaallaqaangalu inuusuttuarartavut periarfissanik tigusillutik arpaannaq saassussisarmata. Assammik arsarsinnaanermut piginnaasaqarluarneri apeqquserneqarsinnaanngillat, taamaallaat unammisarnernik sungiusarluaannassapput, unamminernilu misilittagakinneri takuneqarsinnanngillat, kalaallit angutit assammik arsartartuisa sungiusaasuat, Jakob Andreasen oqarpoq.

Nunarsuaq tamakkerlugu pissartanngorniuttoqarnerani kalaallit naggataamik brasiliamiunut aqagu unammissapput.