Vivi pillugu saaffiginnittut arlaqarput

Vivi Inger Kristiansenip qaammatit qulit matuma siorna toqunneqarsimanera politiit paasiniaanerminni inuinnarnit ikiorneqalersut, paasiniaasut pisortaata, vicekriminalkommisærip, René Frederiksenip nalunaarutigaa.
Allattoq Jaaku Lyberth
maajip 06-at 2009 13:03

- Nassaaarineqarfiani orpippassuarni takunnissimasinnaasunit, tusaasaqarsimasunillu saaffigineqarpugut, René Frederisen aviisimi Dagbladetimi issuarneqarpoq.

Vivi Inger Kristiansen, 30-nik ukioqartoq siorna aasakkut periarfeerunneqartup timaa ataasinngormat illoqarfiup Ringstedip qanittuani orpippassuarni nassaarineqarpoq. Suliaq nutaanngilimmat politiit takunnissimasinnaasunik, tusagaqarsimasinnaasunillu ikiortissarsiorput.

- Vivip ilisarisimasaanit suli saaffiginnittoqanngilaq, ilisimannittulli saaffiginnippata qujarutissavavut, René Frederiksen Ringstedimi aviisimi Dagbladetimi issuarneqarpoq.

- Timip asiusimanera peqqutigalugu oqarsinnaanngilanga suna toqqutigisimaneraa.

- Imaassinnaavoq qaqugumulluunnit toqqutigisimasaata paasinissaa, nujaali misissorneqarput, saarngilu savimmik kapineqaratarsimanissaanik takussutissaasinnaasunik ujaasivigaavut.

René Frederiksenip neriuutigaa toqutap timaa sapaatip akunnera qaangiutsinnagu ilaqutaanut tunniussinnaassallugu.

- Neriuppunga. Maanna suliassarput naammassivarput, toqusimasunillu immikkut paasiniaasartut suliarilerpaat. Qanigisaasut eqqarsaatigalugit suliaq tuaviuupparput, paasiniaasut pisortaat Dagbladet-nimi issuarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq