Vivi Inger Kristiansen suli nassaarineqanngilaq

- Kingusinnerpaamik sapaatip-akunnerata siuliani arlalinnit saaffigineqartarpugut, sumiiffinni arlalinni timaata nassaarineqarsimaneranik tusatsiakkanik. Soorunami tamakkua ingerlaannarluta misissortarpavut, mannali tikillugu paasissutissanik suli nassaanngilagut, Sjællandip Qeqqani aamma Kitaani politiit pisortaata tullia Ove Petersen oqarpoq.

Ujaasineq inummik tammaasaqartoqarnerani nalinginnaasutut aallartinneqarpoq, maannali pinerluuteqarnermi suliatut ingerlanneqalerpoq. Suliaq Roskildemi politiinut immikkut misissuisartunut ingerlateqqinneqareerpoq, tassa pinerluuteqartoqarsimaneratut misissorneqalerluni. Kisianni pinerluuteqartoqarsimanersoq, imaluunniit Vivi Inger Kristiansen suli uumanersoq politiit naluaat.

- Suli uumanersoq naluarput, ujaasinerpummi tamakkerlugu arlaanniissimasinnaaneranik suli paasisaqanngilagut. Ujaasinerput ingerlatiinnassavarput, ujaasinittalu qanoq inerneqarsinnaanera maanna oqaatigisinnaanngilarput, Ove Petersen oqarpoq.

Paasissutissat sapaatip-akunnerata siuliani saqqummersut politiit oqaaseqarfigerusunngilaat.