Vittus: USA-p silap pissusia pillugu isummani allanngortissimavaa
![](/sites/default/files/styles/image_934x467/public/20150817_173445.jpg?itok=lyOrw7KJ)
- Ataatsimeersuarneq USA-p pingaarnersiuinerminik allanngortitsisimaneranik takutitsivoq. Silap pissusia pillugu politikki pingaarnersanngorsimavoq, USA-llu naalagaaffippassuit allat assigalugit ukiuni arlalinngortuni anguniakkat iliuuseqarfiginissaannut piareersimanerminik takutitsinera nuannaarutissaavoq, Vittus Qujaukitsoq nittartakkamut taama oqarpoq.
Vittus Qujaukitsoq Danmarkimilu nunanut allanut tunngasunut ministeri Kristian Jensen, Anchoragemi ataatsimeersuaqataasunut 450-it missaanniittunut ullumi oqalugiartussaapput. Naalagaaffiit qulingiluat nunanut allanut tunngasunut ministerii, ilaatigut Sverigep, Finlandip, Islandip Hollandillu ministerii aamma Kinap, Ruslandip, Japanip, Korea Kujalliup nunallu allat aallartitaat ataatsimeersuarnermi peqataapput.
Aamma atuaruk WWF-ip ataatsimeersuarneq silap pissusianut tunngasoq pitsaanerarpaa
Danmarkimit angalatitat oqaatigaat, Danmarkip gassinik silaannarmik kissatsikkiartortitsisunik atuinerminik annertusaanngikkaluarluni aningaasarsiornikkut siuariartorsinnaasimanera tamatumunngalu teknologiip atorneqartup avammut nioqqutigineqarnerata iluanaarutaasimanera Kristian Jensenip oqaluttuarissavai.
Tamatuma kingorna oqallittoqalerpat Vittus Qujaukitsoq oqaaseqartussaavoq, silap pissusiata allanngoriartornerata Nunatsinnut sunniutai kingunerluutaasinnaasullu pinngitsoortinniarnissaannut iliuuserineqarsinnaasut saqqummiutissallugit. Kristian Jensenillu nalunaarasuartaateqarnikkut qaammataasatigullu aaqqiissutissat Nunatsinni maanna atorneqanngikkunik ineriartortinneqartut aamma saqqummiunniarpai.