Assi: KNR

Vittus tulluusimaanngilaq

Aningaasaqarnermut Naalakkersuisuugallartup qinersinissamut ullut marluinnanngortullu missingersuutit ilumut malinneqarnerannik misissuineq ullumi saqqummiuppai.

Nunatta karsiata ukioq naatinnagu 20 millionit koruuninik sinneqartooruteqarnissaanik siunnerfeqarneq eqquutsinnissaa ajornakusoortoq erserpoq, missingersuutit takutimmagu nnatta karsia ukiup sisamararterutaata pingajuanni 282 millionit koruuninik amigartooruteqartoq.

 

Naalakkersuisuusimasunut naalakkersuisuugallartunullu aningaasaqarnerup inissisimanerata kusanarpallaanngitsunik inerneqarneri aningaasaqarnermut Naalakkersuisup tulluusimaarutiginngilaa.

- Uniuineq imminerminik tulluusimaarnanngilaq. Isertitassat naatsorsuutigisamit nikerartarnerat takornartaanngilaq. Uani ajornartorsiutaasimassagaluarpoq missingersuutinik atuineruallaarluni sippuisoqarsimappat, tassanilu taamaattoqanngilaq.

 

Tugassiortunillu katersortitsereernerup kinguninngua aningaasaqarnermut Naalakkersuisoq Vittus Qujaukitsoq Radioaviisimut kisitsisit pillugit nassuiaateqaqqippoq

- Suliffissaaleqineq akiorniarlugu suliuniutinut assigiinngitsunut 174 million koruuninik aningaasartaqarnerat aningaasaqarnerput sunnerneqartussaasoq nassuiaatigaara. Oqaatigeriikkattulli tupamut aalakoornartumullu akileraarutinullu akitsuutit annikinnerusussaammata aamma avaleraasartoorniarnermi isertitat annikinnerummata amigartooruteqarnermut peqqutaapput, Vittus Qujaukitsoq oqarpoq.

 

Avaleraasartoorniartoqalermat, isertitassatut siunniunneqarput 95 million koruunit, maannalu takutinneqarpoq 74 million koruunit isertinneqarsimasut, tassa 21 million koruuninik isertitassatut siunniussaagaluit annikinnerullutik.

 

- Namminersornerullutik oqartussani aqutsineq ajoqutaanngilaq amigartooruteqarnermi, ilimagisamiit annikinnerusunik nunatta karsianut isaasoqarnera eqquinerlunnermut peqqutaavoq, Vittus Qujaukitsoq oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl