URAN Vittus: ICC-ip nalunaarusiaa ersarinnerusinnaavoq
Kujataani innuttaasut Kuannersuarni uranisiortoqarniarneranut peqataatinneqarnerat naammassorinngikkaat, ICC-p nalunaarusiaata "Ajorpoq - vi får ingen svar"-ip inerniliupaa.
Vittus Qujaukitsulli Namminersorlutik Oqartussat innuttaasunik qanoq akuutitsinerusinnaanissaannik siunnersuutit nalunaarusiami amigaatigai.
- Isumaqarpunga ICC-ip nalunaarusiamini ersernerluppallaartumik uani sutigut Namminersorlutik Oqartussaniit paasissutissiiniarnermigut amigaateqarnera uparuartuutiginerani ersarissumik oqariartuuteqarnissaa taanna amigaataasoq, Vittus Qujaukitsoq taama oqarpoq.
Uparuartuutit naalarnisariaqarput
Taamatulli oqarnera nalunaarusiamut tusaanngitsuusaarnertut paasineqassanngitsoq, naalakkersuisup oqaatigaa.
- Soorunami uparuartuutit suulluunniit naalarnisariaqarpagut aamma imatut itisiliisoqarnissaanik kissaateqarnera isigineqassanngilaq nalunaarusiaq taanna tusaanngitsuusaarniariga. Uangaana sulinitta paasisitsiniaanittalu ersarinissaanik sunik qanorlu amigaateqartoqarnera taanna ersarinnerusumik paasisaqarfigerusukkiga, Vittus Qujaukitsoq oqarpoq.
Aamma atuaruk ICC uran pillugu: Innuttaasut tusarneqarnatik suli misigipput
Namminersorlutik Oqartussallu paasissutissiinissamut suliaqartorujussuusut, Qujaukitsoq oqarpoq.
Ilaatigut misissuinissamut aningaasaliisartut, ICC-llu nalunaarusiaanut aamma aningaasaliisut, Vittus Qujaukitsup erseqqissaatigaa.
- Soorlu nalunaarusiami pineqartumi aningaasaliissuteqarpugut taamaasillutik innuttaasut nalornissuteqartut annerusumik paasisaqarnissaannut aqqutissiuusseqataasinnaallutik aningaasaliissutaasut, Suliffeqarnermut, Niuernermut Nunanullu allanut Naalakkersuisoq, Vittus Qujaukitsoq oqarpoq.
