Visit Greenland: Pilersaarusiorluarnikkut AWG sinneqartoorsinnaavoq

- Sunaana oqaluttuariniaripput? Kikkunnut nunanullu sorlernut? Kikkut suleqatigalugit qanoq ililluta assersuutigalugu isiginnaarutitigut ilanngutassiussanersugut, filminilluunniit naatsulianik atuilluta nittarsaassissanersugut paasiniassagatsigu. Taamatut pilersaarusiorluartoqarpat iluanaarutaasinnaasut amerlassapput, Nunatsinni takornariartitsivimmi Visit Greenlandimi pisortaaneq Anders Stenbakken oqarpoq.

Kommuneqarfik Sermersooq Namminersorlutillu Oqartussat pisortatigoortumik sapaatip akunnera kingulleq, Arctic Winter Gamesip nunani tamalaani ataatsimiititaliaanut qinnuteqaammik nassiussipput.

Qinnuteqaammi erseqqissarneqarpoq Iqaluit Nunavummi suleqatigineqassasut. Kisianni 2002-mitut aaqqissuussineq avinneqassanngilaq.

- Qinnuteqaammi allapparput sukuutsertarfimmik sanarusunnata, siunnersuutigalugulu sukuutsinik unammiuaarnerit Iqalunni ingerlanneqassasut,  qinnuteqaasiornermi suleqatigiinni siulittaasoq William Kriegel Kommuneqarfik Sermersuumeersoq taama oqarpoq. 

Aaqqissuussinermut aningaasartuutigineqartussat 48 millionit koruunit missaaniissangatippai. Taakkulu aningaasartuutaasussat Namminersorlutik Oqartussat Kommuneqarfik Sermersuullu avissallugit isumaqatigiissutigaat.

- Aaqqissuussat Arctic Winter Gamesimit annerusut takoriarutsigit OL-imik aaqqissuussineq soorunami eqqarsaatigineqarsinnaavoq. Nunat assigiinngitsut taassuminnga aamma aaqqissuusserusuttarput, nalunnginnamikku aningaasatigut aamma isertitsissutaasinnaasoq. Taava aperisoqarsinnaavoq: Sooruna taama akisutigisumik aaqqissuusserusuttoqartartoq?

- Akissutaalu tassaavoq nunap nittaarsaalluarneqartarnera. Aningaasammi takornariaqartitsinermit kaaviiaartitat amerlanerulersarput, Visit Greenlandimi pisortaaneq Anders Stenbakken oqarpoq.

Qinnuteqaammi eqqaaneqarpoq inuit 2.000-it missaaniittut avataaniit peqataatinneqassasut, sulili unammiuaarnissat ullulerneqaratik.