VISIT GREENLAND Timmisartukkut angallannermik misilittagaqarluartoq siulersuisunut ilaasortanngorpoq
Takornariartitsinermi siunnersuisoqatigiit juunip aallartisimalernerani ataatsimeersuarmat tamanna pivoq.
Visit Greenlandimi pisortap Anders Stenbakkenip timmisartukkut angallannermik misilittagaqarluartumik Arni Gunnarssonimik suleqatiginissani qilanaaraa.
- Kalaallit Nunaanni takornariaqarnerup ineriartortinniaraanni soqutiginnittut tamaasa oqaloqatiginissaat suleqatiginissaallu pingaaruteqarpoq, Anders Stenbakken KNR-imut oqarpoq.
Air Greenland siulersuisuni sinniisoqareerput, Air Icelandimiillu ilaasortanngortoqarnera naleqquttuusoq, Anders Stenbakken isumaqarpoq, Air Icelandimmi nunatsinni ukiuni kingullerni timmisartuussineq aallunneruleriartuinnarsimavaa.
- Timmisartortitseqatigiit suut pisariaqartinneraat suullu soqutigisarineraat paasissallugu pingaaruteqarmat siulersuisut akornanni oqallisigineqarsinnaasut amerlaqaat, Visit Greenlandimi pisortaq Anders Stenbakken oqarpoq.