Virusi qarasaasiamik ajoqusiisartoq mianersorfigeqquaat
Virusi Facebookimit nassiussatut ilisarnarunnaarsagaavoq, facebookimilu ikinngutivit takoqqusaani videomi imaluunniit nittartakkami allami takoqquneqartumiissinnaalluni. Ingerlaartinneqartumi nalunaarutip taaguuserneqarfiani You Tubemik allaqqasoq, Politikenip nittartagaani allaaserineqarpoq. Aviisip Politikenip nittartagaani taama allaaserinnittoqarpoq.
Matumanilu mianersorluartariaqarpoq, tassami iserfissaq facebookimi iserfissanut nalinginnaasunut assingulluinnarmat. Mailikkut nassiussami facebook nassiussisutut allaqqavoq, ikinngutillu nassiussisuunerarneqartoq, facebookimi attaveqarfigisartakkavit ilagaat.
Mailikkulli nassiussap asuleerutaanera maluginiartariaqarpoq, ingerlaannartumillu peerneqartariaqartoq suliffeqarfik virusinut akiuiniarfik F-Secure mianersoqqussummini allappoq. Suliffeqarfiup taassuma virusip sorpiaanera misissoqqissaaleruttorpaa.
Politikenimili oqaatigineqarpoq, nassiussaq atuaannarlugu ajoqusiinavianngitsoq, aatsaalli iserfissaq tooraanni virusi aaneqartarluni. Taama pisoqarpat qarasaasiaq ingerlajumajunnaassaaq, Windowsillu ikkuteqqinneqarnissaa pisariaqalissalluni, taamaalisoqarpallu atuisup qarasaasiami toqqortani tamaasa annaassavai.
Politikenimi allaaserisami oqaatigineqarpoq, virusi sakkortungaarmat programmit virusinut akiuinermi atorneqartartut arlallit unitsissinnaanngikkaat.