Virusi nakkutigeqqissaarneqartariaqarsoraa
Kina-mi nakorsat nuimanersaasa ilaata paasisimavaa timmissat nappaataanni nappaateqalersitsisartut takussaanngitsut virusit ilaat H5N1-imik taaguutilik, piaartumik iliuuseqarfigineqanngikkuni, nutaanik kingunissaqalersinnaasoq taamalu inunnik toqutsisinnaalerluni.
Allattoq Louise M. Kleemann
marsip 11-at 2008 07:22
Zhong Nansham anersaartuutitigut nappaatinut immikkut ilisimasaliusoq, Beijingimi tusagassiortunik katersortitsinermi oqarpoq, inuit nualluutinik allanik tunillatsissimanerisa nalaani virusi H5N1 nakkutigeqqissaarneqartariaqartoq.
- Timmissat nappaataat inuit nualluutaannut allanut akuutilluni kingunissaqalersinnaavoq tamannalu inunnik eqquisinnaasoq, Zhong Nanshan nutaarsiassaqartitsivimmit Ritzauimit taama issuarneqarpoq.
Inuit timmissat nappaataannik siorna ukiormannalu toqquteqartut napparsimavallaarnertik pissutigalugu katsorsartissinnaasimanngillat.
Nunarsuaq tamakkerlugu 2003-miit inuit 368-it virusimit H5N1-imit tunillanneqarsimapput taakkunanngalu 234 tamanna toqqutigisimavaat.
