Vikingit umiarsuaannik Nunatsinni aasaru angalalersut
Vikingit umiarsuaat Skjoldungen meterinik aqqanilinnik takitigisoq, angutinik arnanillu katillugit arfineq-pingasunik inuttaqarluni Nanortalimmit Nuup tungaanut ingerlaassaaq, nutaarsiassaqartitsivik Ritzaus Bureau taama allaaserisaqarpoq.
Vikingit umiarsuaannik katersugaasivik Roskildemiittoq, qallunaatsiaat ukiuni 1000-ikkunni Nunatsinni qanoq angalasarsimanerannik inuusimanerannillu misissuiniarpoq. Tamannalu vikingit umiarsuaannik pissaaq, umiarsuup Skuldelev 6-ip assinga, Norgep kitaani sananeqarsimasoq Roskildellu kangerluani nassaarineqartoq.
Angalaneq "misileraatigaluni qanganisarsiornertut" ingerlanneqassasoq, Vikingit umiarsuaannik katersugaasivimmi ilisimatusarnikkut ataqatigiissaarisup Morten Ravnip oqaatigaa.
- Qallunaatsiaat najugaqarfigisimasaat tamarmik sinerissamut qanittumiipput imaatigullu angalanissaq imminnut attaveqarnissaannut pitsaanerpaasimassagunarpoq, qanorli angalasinnaatigisimappat? Tamanna paasisaqarfiginerusinnaagutsigu inuiaqatigiit taamani inuusut aamma ilisimasaqarfiginerulissavagut, ilisimatusarnikkut ataqatigiissaarisoq taama oqarpoq.
Royal Arctic Linep vikingit umiarsuaat Nanortalimmukaatissavaa, angalanerlu juulip aappaani aallartissaaq sapaatit-akunnerinilu arfinilinni sivisussuseqassalluni.
Inuttat angalanerminni vikingit qanga inooriaasiat atussavaat, silali anorilu pillugit paasissutissat elektroniskiusut atornissaannut periarfissaqassapput.
