Vikingit qitsunnik nunatsinnut nassataqartarsimasut
Qitsuit vikinginit, umiartortunit nunalerisunillu nassarneqarlutik Eurasiamut (Kangiata Europallu ataffigisaat, aaqq.) Afrikamullu pisimanerat qitsuit itsarnitsat DNA-vinik misissuinerit nunarsuarmi annerit siullersaanni paasineqarpoq. Vikingilli aamma qitsunnik nunatsinnut nassarsimasut, Itsarnisarsiuup ph.d.-p Christian Koch Madsenip nittartakkamut Videnskab.dk-mut oqaatigaa.
Itsarnisarsiooq danskiusoq Danmarkip Katersugaasivissuani Københavnimiittumi aamma Nunatta Katersugaasivissuani atorfeqarpoq. Taanna oqaluttuarpoq qitsuuteqartoqarsimaneranut uppernarsaatissanik itsarnisarsiuut nassaarsimasut, tamannalu tunngavigalugu 'vikingit qitsunnik nassataqartarsimanissaannik' inerniliivoq.
Ilisimatuut arlallit videnskab.dk-mut oqaatigaat qitsuit teriarsuarnik terissanillu piniallaqqissuunerat pissutigerpiarlugu vikingit, imarsiortut nunalerisullu angalagaangamik nassartarsimassagaat.
Qitsuilli vikingit nalaanni illup iluani uumasuutigineqaannartarsimanngillat. Aamma oqaluttuatoqqanik oqaluttuartoqaraangat ilaasarsimapput.
Asanninnerup guutianik Frejamik oqaluttuami, guuti taanna marlunnik qitsuuteqarpoq, taakkulu qimuttorisarpai, Thorilu Udgårdimut pulaarami qitsuk kivinniarsaraa, paasilluguli tassaasoq qullugiarsuaq Midgårdsormen.