VIDEO Urani pillugu isumaqatigiinniarneq ajornakusoorpoq
Atassumeersup Steen Lyngep siunnersuutaa pingasunngormat oqallisigineqarpoq.
Aatsitassarsiornermi piaanermi piiakkat radioaktiviusinnaasut qummut 0,05%-imik qaffasinnerpaaffilernissaat pillugu innuttaasunik taasisitsisoqarnissaa kissaatigaa.
Siumumeersoq Suka K. Frederiksen oqallinnermi oqalliseqataalluarpoq.
- Oqallinneq uummaarissumik ingerlavoq, aamma inuiaqatigiit soorlu oqallinnerattulli isikkoqartutut taaneqarsinnaalluni. Isumaqarpunga sakkortusisinnaasaraluarluni apeqqutit pisariaqartut ilaatigut aamma saqqummertartut.
- Taamaakkaluartoq aamma oqallittariaatsitta killiffia uani ersarilluarpoq. Ajornartorsiutinik aaqqiinniarnermut suli ilinniagassaqarpugut aamma pikkorinnerusinnaaffigut tassani ersaripput. Taamaakkaluartoq alloriartarpugut aamma isumaqatigiinngissutigisagut soorunalimi isumagut illersortaratsigu aamma isummat tunngavilersorniarneri isumaqarpunga alloriarfigingaatsiartarigut, Suka K. Frederiksen KNR-mut oqarpoq.
Oqallinnermi isumatigiininniarnerit ingerlanneqarnerusut Inuit Ataqatigiimmeersoq Aqqaluaq B. Egede isumaqarpoq.
- Siunnersuutaa pillugu oqallinnermi aamma urani ilaatigut ilaammat, qinngornerit ulorianartut pillugit. Inuiaqatigiinni naaperiarfissarsiortariaqarnerput ullumi ingerlapparput, iluatsippallaanngisatsinnik, Aqqaluaq B. Egede taama oqarpoq.
Aamma atuaruk URANI Isummat allanngorpata Namminersorlutik Oqartussat taarsiisariaqalersinnaapput
Aamma atuaruk URANI Lynge siunnersuummini kisimiivippoq
Politikikkut ilaasortatoqqat tapersersuisut akerliullusullu
Siumumit ilaasortatoqap, Hendrik Nielsenip Atassummiillu ilaasortatoqap, Sofie Kielsenip oqallinneq TV-kut Qaqortumit malinnaaffigaat.
- Inatsisartut oqallinnerat nuannerpoq. Isummatik annissorpaat, taanna nuannaraara, Hendrik Nielsen taama oqarpoq.
- Inatsisartut ullumi oqallinnerat isumaqarpunga pitsaanerusariaqaraluartoq suli. Ersernerluttutut isigigakku. Akisussaaqatigiittariaqaratta taama pingaaruteqartigisumi, uranimut akerliusoq, Sofie Kielsen oqarpoq.
Steen Lyngep siunnersuutaa itigartinneqarmat Hendrik Nielsen eqqissiallappoq, Sofie Kielsenili pakatsilluni.
Aamma atuaruk Vittus: ICC-ip nalunaarusiaa ersarinnerusinnaavoq
Aamma atuaruk IA-p SF-illu uranimut inatsit isumaqatigiinngissutigaat
Naaperiaasinnaaneq naaperiaasinnaannginnerluunniit
Piiaanermi piiakkat radioaktiviusinnasut qanoq annertutigisunik imaqarsinnaanersut qummut qaffasinnerpaaffiliinissaat pillugu,Inatsisartuni partiinni tallimani naaperiaasinnaaneq periarfissatut Suka K. Frederiksenip isigaa.
- Taamaasilluta qulakkeersinnaagatsigu soorlu aatsaaginnaq aamma oqaatigigaat eqqagassat kingunissaalu (avatangiisit inuiaqatigiillu, aaqq.), Suka K. Frederiksen oqarpoq.
Aqqaluaq B. Egedep naaperiaasinnaaneq takorlooruminaatsippaa.
- Siornatigut uagut naaggaavissornermik toqqammaveqarnikuuvugut. Uanilu naaperiarfissat toqqagarput, tassaavoq innuttaasut taasititsiniartigit. Aamma sanioraartumik ingerlasoqannginniassammat kikkut siuttuunerat aallaavigalugu allanngortittarlugu, Aqqaluaq B. Egede oqarpoq.
Inatsisartuni urani pillugu sisamanngormat oqallittoqaqqippoq.