VIDEO Inatsisartut Ataatsimiittarfissaata inissisimaffissaanut akuersaartut akerliusullu
Nuummi innuttaasut ilaat ataatsimiittarfittaassap inissisimaffissaanut isumaqataanngitsut oqaloqatigaagut. Lars Emil Johansenillu sooq tassungarpiaq inissinneqassanersoq Qanoruumi nassuiaateqarfigaa.
- Maanimiuunngikkaluarlunga akuerinngilara. Maaneeqqaartaleramali takanna eriagisariaqartut isigiuarakku, Jens Adolfsen Geråe KNR-imut oqarpoq.
- Tuapannguani sanaartorneqassappat akisuallaassaqaaq sissamullu qanippallaarluni. Aamma sanaartorfissagissaanissaq akisuallaassaqaaq.
- Blok P-p toqqavigisimasaa piukkunnarnerpaagaluarpoq, taannami sanaartornissamut piareersarneqareerpoq, Oline Steenholdt isumaqarpoq.
AAMMA ATUARUK Ilisimatusarfimmi pisortaq: Lars-Emil allatut iliorsinnaagaluarpoq
Innuttaasullu allat ataatsimiittarfittaassaq allarluinnarmut inissikkusukkaluarpaat.
- Aalaaluttut akornannut, illoqarfiup qeqqanut, inissinneqarnissaa tulluartinnerugaluarpara. Sanaartorfigineqarsinnaasummi amerlaqaat, Lone Adolfsen isumaqarpoq.
Nuummit Eqqaamasat isumaqataanngilluinnarpoq
Najukkami oqaluttuarisaaneq pillugu peqatigiiffiup, Nuummit Eqqaamasat, Aqqaluup Aneerasaartarfianut inissiisoqarniarnera akerlerisupilussuuaa.
- Nuummit Eqqaamasanit kommunalbestyrelsimut allagaqareernikuuvugut, tasersuarminngaanniit amutsivik tikillugu tamarmi eqqissisitaassasoq sanaartorfigineqaranilu. Taamaattumik Inatsisartunut ataatsimiittarfiliorfiginissaa aamma isumaqatiginngilara, Stephen Heilmann oqarpoq.
Oqaluttuassaqanngilaq
Quppersakkami Lars-Emil Johansenip suliaritissimasaani, allassimavoq Inatsisartut Ataatsimiittarfissaat Aqqaluup Aneerasaartarfianiissappat tamat oqartussaaqataaneranni oqaluttuarisaanitsinnut ileqqutsinnullu naapertuutissasoq.
- Manna immikkut tamat oqartussaaqataanerannut oqaluttuassaqanngilaq, Stephen Heilmann oqarpoq, ataatsimiittarfiullu maanna inissisimaffigisaaniitiinnarneqarnissaa siunnersuutigalugu.
AAMMA ATUARUK Inatsisartoqarfik sakkortuumik isornartorsiorneqartoq
Inatsisartut siulittaasuata, Lars-Emil Johansenip, Qanoruumi apersorneqarluni erseqqissaatigaa isummerneruinnarmat.
- Erseqqissumik isummerneruvoq, aamma suna piukkunnarnerunersoq toqqarparput.
- Pissutigalugu taakku periarfissat pingasut akornanni piukkunnerusarput toqqaratsigu. Uagut aalajangigassarinngilarput, kommunalbestyrelsip taanna aalajangigassarivaa.
- Kommunalbestyrelsi aalajangerpoq Nuummi innuttaasut taasitinneqassasut. Nuummilu innuttaasut taasisussat paasissutissaqartariaqarmata arlaannik naqitannguamik sanasimavugut, Lars-Emil Johansen erseqqissaavoq.
Illit qanoq isumaqarpit? Ataani isummersoqataagit.
