VIDEO: Igalikumi nunanit allanit ukioq manna takornariaqanngitsoq

Igalikumi nunanit allanit takornariat nunatsinneersunit takornarianik ukioq manna taarserneqarput. Taamaasilluni kalaallisut qallunaatullu taamaallaat oqaluttoqarpoq.
Unnuisarfeeqqat mikisunnguit iserfigalugit sinittarfeqarpoq, ineeraqarlunilu. Uanilu illumi aappaluttumi igasarfeqarpoq, uffarfeqarluni perusuersartarfeqarlunilu, Garderimi piginnittoq Malene Egede oqarpoq. Assi © : KNR
aggustip 12-at 2020 10:29

Nunanit allaneersunit Igaliku aasakkut takornariarneqallattaasaraluarpoq. Nunanit allaneersuniilli ukioq manna takornariaqannginnera unnuisut 75 procentimik ikileriarneranik kinguneqarpoq.

Taamaakkaluartoq sineriammeersunit Igalikumut takornariaqarnera aningaasaqarnermut iluaqutaasoq, takornarialerisunik ingerlataqartut oqarput.

-Oqaatsit assigiinngitsut maani atorneqartarneri sungiusimavarput, kalaallisuinnarli qallunaatuinnarlu ukioq manna oqaluttoqarpoq. Aasarsiornerput allaanerulaarnera iluaraluartoq, unnuisut ikilinerat uggorisorujussuuarput, Blue Ice Explorerimi tunisassialerinermi ingerlatsisoq Sten Svendsen oqarpoq.  

 

KNR.gl Igalikumi takornarialerisut