Hammeken: Niuernerput iluarisimaarnarpoq
Royal Arctic Line umiarsuassamut nutaamut Nuup Danmarkillu akornanni angalasartussamut 220 millionit koruuninik aningaasaleeqqammerpoq. Pisortaq naapertorlugu Namminersorlutik Oqartussat umiarsuaatileqatigiiffiata umiarsuarmik maannakkorpiaq inniminnernera iluanaaruteqangaatsiarfiussaaq.
- Nunarsuarmi umiarsualiorfissuit ilungersunartorsiorneranni umiarsuarnik maannakkut sanaartortitsinissaq akikitsuaraarsuuvoq, Royal Arctic Linemi pisortaq, Verner Hammeken oqarpoq.
Umiarsuaq atlantikukkoortartussaassaaq, 2019-imi tigugunikku aqqut sunarpiaq aqqugissaneraa suli aalajangivinneqanngitsoq, pisortap oqaatigaa.
AAMMA ATUARUK RAL umiarsuarujussuarmik sanaartortitsilersoq
RAL-ip Danmarkimiit Savalimmiut Islandilu aqqusaarlugit sapaatip akunneranut ataasiarluni Nuuliartarsinnaanissamut pilersaaruteqarnerani islandimiut umiarsuaateqarfiannut Eimskibimut suleqatigiinnissamik isumaqatigiinninniarnerata iluatsinneqarnissaa tamatumunga apeqqutaavoq.
Pisortaq: Ingerlatsinermi nalinginnaasumi umiarsuaq atorneqarsinnaassaaq
Pilersaarutit taakku islandimiut danskillu unammillernermut oqartussaasuinit ilaatigut akuerineqaqqaassapput saniatigullu Savalimmiuni Thorshavnimi talittarfimmik alliliisoqassaaq.
RAL-ip pilersaarutini iluatsissinnaassagaa pisortap qularutiginngilaa, iluatsinngippalli umiarsuaq maanna pigeriikkanit anginerugaluartoq ingerlatseriaatsimi atorneqarsinnaavoq.
AAMMA ATUARUK Nunatsinnut assartuisarnerit RAL-ip amerlisarusukkai
- Iluatsinngikkaluarutsigu umiarsuaq maannakkut pigeriikkatsinnit nutaaliaanerungaatsiartoq umiarsuit pigisatta ingerlannerannut aningaasartuutit nalingiinnassavai, angalanissamilu pilersaarutitsinni umiarsuit allat assigalugit angalaannassalluni. Royal Arctic Linemi pisortaq, Verner Hammeken oqarpoq.
Pisortap aamma erseqqissarpaa umiarsuaatit nutarsarneranni akinik qaffaannginnissaq anguniagarineqartoq. Suliffeqarfillu pitsanngorsaataasussanik umiarsuaatileqatigiiffinnik allanik suleqatigiinnissamik isumaqatigiissuteqarniarpoq.
