VHF aamma GPS iluaqutaasinnaaqaat
Imaani isumannaatsumik angalanissaq pillugu Namminersorlutik Oqartussat paasititsiniaanerisa iluaqutaanera suli ujaasinerit ajunaarnerillu amerlassusaasigut takuneqarsinnaanngikkallarpoq. Politimestereqarfiulli qularutiginngilaa tamanna sillimaniarnermut atortoqarnissamik ilisimasaqarnerulersitsippat iluaqutaalerumaartoq.
2009-mi ujaasinerit 77-upput ajunaartut 13-ullutik. 2010-mi ujaasinerit 76-upput ajunaartut 27-ullutik. Taamatullu alianartumik pisoqartarnera pitsaaliorniarlugu imaani isumannaatsumik angalanissaq pillugu Namminersorlutik Oqartussat paasititsiniaaneq upernaaq aallartippaat.
Paasititsiniaanerli iluaqutaanersoq takuniaraanni kisitsisit kisimik tunngaviusariaqanngitsut politiit isumaqarput.
- Angallarikkaluilluunniit ajutoorsinnaasarput. Angalatillunili VHF radio-mik aamma GPS atorlugu sumiissusersiummik atuinissaq annertunerulerpat taava ajutoortut sukkanerusumik nassaarineqartalissapput. Sulili annaassiniartoqarumaarpoq kisiannili ujaasineq sivikinneralaarsuanngorsinnaalluni, politimester Bjørn Bay KNR-imut taama oqarpoq.
Ujaasinerit ajunaartullu aasaq manna ikilissagaluarpata paasitsiniaanerup iluaqutaaneranut tamanna tutsissallugu suli siusippallaarpoq.
- Kalaallit Nunaanni inuit 56.000-iinnaavugut taamaattumik ujaasinerit ajunaartullu ukiumiit ukiumut amerlassutsimikkut allanngorarsinnaasarput. Kisianni tamakku ukiut marluk pingasut ingerlaneranni ikiliartuinnassappata taava paasititsiniaaneq iluaqutaasoq oqaatigisinnaalissavarput. Kisianni qularutiginngilara siunissaq ungasinnerusoq isigalugu paasititsiniaaneq iluaqutaajumaartoq qularutiginngilara, Bjørn Bay taama oqarpoq.
