Kitaani kommunit nunatsinni nunamik nutaamik eqqissisimatitaqalerusuttut
Nunatsinni nuna eqqissisimatitaq ataasiinnaasinnaanngilaq.
Kommune Qeqertalimmi borgmesteri, Ane Hansen aamma Qeqqata Kommuniani borgmesteri, Malik Berthelsen taama isumaqarput.
Kommunit taakku marluk aningaasaateqarfik, WILD Nature Foundation peqatigalugu nunamik eqqissisimatitamik nutaamik pilersitsinissamik sulissuteqarput.
Nunarput UNESCO-p nunarsuarmiut eriagisasanngortitaani
Nunarput UNESCO-p nunarsuarmiunut eriagisassanngortitaani immikkoortuni pingasuni ilaavoq, kingornussalli tigussaanngitsut allattorsimaffiannut qilaatersorneq siulliulluni ilanngunniarneqarpoq.
Ilulissat kangerlua pinngortitatut eriagisassatut 2014-mi allattorsimaffimmiilerpoq, nunatsinniillu UNESCO-p allattorsimaffianniilersumi siulliulluni.
Nuna kulturikkut eriagisassap Kujataata piniartuunerup nunalerinerullu kulturia naggueqatigiit inuit qallunaatsiaallu pilersitaanniittoq takutipaa. Sumiiffik taanna kulturikkut eriagisassanut 2017-imi allattorsimaffimmiilerpoq.
Nuna kulturikkut eriagisassaq Aasivissuit – Nipisat UNESCO-p allattorsimaffianut 2018-imi ilanngunneqarpoq. Sumiiffimmi tassani Sermersuarmi imaanilu piniartuunermit takussutissaqarpoq.
Taakku nunatta kitaani nunamik eqqissisimatitassamik nutaamik pilersitsinissamut periarfissamik misissuipput.
Pinngortami pissutsinik nalissaqanngitsut allanngortinneqannginnissaat sumiiffimmilu najugallit takornariallu takusaqarsinnaanissaannut periarfissaqartitsinissamut isumamik qulakkeeriniarneruvoq.
Qeqqata Kommunia tusagassiuutinut nalunaarummi taama allappoq.
Suleqatigiit pingasuusut sumiiffiit Eqalummiut Nunaat aamma Nassuttuup Nunaa kommunini taakkunani marlunni inissisimasut ukkatarineqarput.
AAMMA ATUARUK Qilaatersorneq nunarsuarmiunut eriagisassanngortinniarneqartoq
Sumiiffik taanna 5795 kvadratkilometerinik angissuseqarpoq.
Kommune Qeqertalimmi borgmesterip, Ane Hansenip sumiiffik ilaatigut timmiaqarfissuusoq erseqqissaatigaa.
Sumiiffillu taanna nunatsinni aamma tuttoqarfiunerpaallunilu nunatsinni tuttunut piaqqiorfiunerpaavoq.
Illuatungeriit nunaminertami ”nungusaataanngitsumik piniarneq ileqquusoq” ingerlaannassasoq isumaqatigiissutigalugu tusagassiuutinut nalunaarummi allappaat.
Sumiiffimmik misissuinermik suliaqarneq aamma aallartippoq.
Tamatuma kingorna innuttaasut ilanngunneqassapput, Inatsisartullu Naalakkersuisullu suliniummut aappaagumut aalajangiisinnaanissaat kommuninit taakkunannga neriuutigineqarpoq.
