Vesterbirk: Nannunniartarnissamut akerliuniat nakkaannarfiginagit

Nunatsinni tammajuitsussanik nannunniartitsisalernissaq nunani tamalaani uumasunik illersuinianit arlalissuarnit sakkortuumik isorineqarpoq.

- Tamannali uniffigissanngilarput nannunniartitsisarnissaq piujuaannartitsinissamut innarliinavianngimmat. Taama isumaqarpoq Nunatta Bruxelles-imi sinniisaa Lars Vesterbirk.

Kisianni isorinninneq qanormita isikkoqarpa? Lars Vesterbirk taama aperaarput imalu akivoq:

-Uagutsinnut aallartitaqarfimmut atassuteqarsinnaasut tassaapput sumiiffinni ataasiakkaani uumasunik illersuiniarnermut peqatigiiffiit mikinerit, nunarsuaq tamakkerlugu uumasunik illersuiniaqatigiiffimmut IFOR-imut imaluunniit Greenpeace-mut ilaasortaasut. – Kisianni tassa nunarsuarmi uumasunik illersuiniaqatigiiffeqarpoq angisuunik tallimanik arfinilinnik.

Tammajuitsussarsiniartitsilluni piniariartitsisarnerit pillugit taamatut qisuariarnerit qaqugumulluunniit naatsorsuutigisariaqarpavut.

Ukioq ataaseq qaangiuppoq Belgiami naalakkersuisut nutaat puisit amiinik nuanmut eqqussanik atueqqusiunnaarmarta, ullut 14-nit missaani oqallisaariarlutik puigorneqarput. Pisut taamaattut uumasunut tunngasuuppata qaqugumulluunniit misigisaqarfigiuassavagut.

Taamatut qisuariartarnerit siullermik aallaaveqartarput ilisimaatsuunermit, tassa inuit qisuariaaateqartartut ilisimasaqarneq ajorput piujuartitsinissaq, nunat inoqqaavisa atugaat pillugit, nalulluinnartarpaallu qanoq uumasut pineqartut inooriaaseqarnersut.

Peqatigiiffiit taamaattut piumasaqaataannut tunniutiinnartoqassanngilaq.

Nannnunniarnermi maleruqqussat nutaat pillugit nammineq qanoq isumaqarnersoq aperigatsinni akivoq ajoriffissaqartinnagit pissutigalugu tassani aningaasanik piniartunut amerlanernik kaaviaartitsinissaq anguniarneqarmat, assersuutitullu taallugu nanoq uumatillugu akigineqarmat toqoreersimasup amia pinnagu. Tassanilu suna assigiinngissutaasinnaanersoq takusinnaannginnerarpaa.