Vesterbirk: Kalaallit Nunaata assaani sarliaannanngilai

EU-mi ilaasortaat puisip amianik mersukkanik pisisarneq akerliuffiginiarlugu atsiortartut amerliartornerat nunatsinnit eqqumaniarfigineqaqaaq.

Mersukkanik pisiortorunnaarnerup nunatsinnut kingunipilorisinnaasai pillugit Naalakkersuisunut ilaasortap Josef Motzfeldtip ammasumik allagai EU-mi ilaasortanut 732-nut Strassbourgimi katersuuttunut ullumi agguaanneqarput. Allakkat pillugit nunatta sinniisuutitaa Lars Vesterbirk Bruxellesimiittoq ima nassuiaavoq.

- Saaffigineqassagaluarutta paasissutissanik nassitsiviginiassagatsigit nassiussiffigisinnaasatsinnik piumassaagut. Ilaasortat atsiortitsinerminnut tunngavigiliussimavaat puisit nungutaanngujuulersut tamannalu eqqunngilluinnarmat paasissutissiffigissavagut taamaattoqanngitsoq. Amerlanerillu kukkusumik paasissutissiiffigineqannginniassammata maannangaaq eqqortumik paasissutissiiniarluta aalajangersimavugut, Lars Vesterbirk oqarpoq.

Taanna aperaarput kikkut taamattut atsiortitseqattaarnersut imalu akivoq:

- EU-mi inatsisartuni ilaasortat arfineq-marlooqqooqaat atsiortitsisaqattaarput. EU-milu siulittaasoqarfimmi ilaasortaq ataaseq atsiortitsinermut suliniuteqartunut ilaavoq. Parti apeqqutaatinnagu isumaqataasut atsiortarput, Lars Vesterbirk akivoq.

Isumaqataallutik atsiorsimasut maannamut 100-t missaanniipput EU-milu inatsisartuni ilaasortat affai sinnerlugit atsiussagaluarpata nunatta aallartitaasa paasissutissiiniarnerat iluaqutaasinnaajunnaareersimassaaq.

- Akilinermi puisit amiinik mersukkat EU-mi ilaasortanit pisiarineqartarneri inerteqqutigisilersinnarlugit 1980-kkunni atsiortitsisaqattaarneq iluatsitoq nunatsinni pisarineqarsimasunut attuumassuteqanngilaq. Taamaattorli taamanikkut pisequsiunnaaneq ima kimeqatigisimavoq allaat Kalaallit Nunaanni puisit amiinik nioqquteqarneq eqqorneqarluni. Sivisuumillu taakkunannga nioqquteqarniarneq ajornakusoorsimaqaaq. Tamannalu pinngitsoortinniarlugu maannagaaq paasititsiniaavugut oqarluta eqqortumik paasissutissanik pissarseqqaarlusi iliuuseqarniaritsi, Nunatta Bruxellesimi aallartitaa Lars Vesterbirk taama oqarpoq.