Ilinniartitsisutsialak qajartortoq
Arnaq inuusuttoq Maggie Macdonnell, ilinniartitsisutsialattut nersornaammik nunani tamalaani tunniunneqartartumik ukioq manna marsimi tunineqarpoq. Nunavimmi nunaqarfiit avannarlersaanni Salluimmi inuusuttut pillugit suliniuteqarsimanini Macdonnellip nersorneqaatigaa, nersornaallu 6 millionit koruuninik aningaasartaqarpoq.
Nunavimmi inuusuttut timersortarfissaannik sungiusartarfissannillu Macdonnell pilersitsisimavoq, pinaveersaartitsinermut atatillugu tamakku pilersillugit.
Inuusuttut imigassamik ikiaroornartumillu atornerluinerat pinaveersaartinniarlugu suliniutaavoq, Salluimmilu imminut toquttarnerup akiorniarneqarnissaanut aamma suliniutaalluni.
Uini inuusuttullu sisamat peqatigalugit qajartornermik sungiusaasutut ilinniarsimavoq. Qajartornermik ilinniarfimmik Nunavimmi maanna pilersitsinialerput, aningaasat nersornaaserneqarnermi tunniunneqartut matumani atorneqassallutik.
Inuusuttut amerlanerusut qangatut inooriaaseqarnerujartortillutik avataanit ajortunik sunnerneqarnikinneruleriartortartut, Maggie Macdonnellip CBC Newsimut oqaatigaa.
Qajartornermik sungiusaasut nutaat ilaata Josie Kakakuyuup Macdonnell isumaqatigaa:
- Qajartornermik suliniut tulluusimaarutigaara, kulturikkummi kingornussassarigatsigu, Kakakuyuk oqarpoq.