Venstrerimeersup FN isornartorsiorpaa
Taassuma Naalagaaffiit Peqatigiit "aliikkutaralugu oqaloqatigiittarfittut" taavai, "kisermaassillutik naalakkersuisorpassuarnik akuersaaginnartutut" oqaatigalugit. Tamatumunnga peqatigitillugu oqarluni, Naalagaaffiit Peqatigiit Nunarsuarmiunut iliuuseqangaarsimanngitsut, taamaattumik takussaavallaanngitsumik pisortaqarnerat ajunngiinnartoq.
Søren Pindip taamatut oqaaseqarnera Socialdemokratit siulittaasuata Helle Thorningip qisuariarfigaa. Taannami isumaqarpoq, Søren Pindip taama oqaaseqarnermigut Danmark innarleraa, taamaattumillu kissaatigalugu Søren Pindip Naalagaaffiit Peqatigiit pillugit oqaasii Venstret ataatsimoortumik isummiussarineraat, ministeriunerup Lars Løkke Rasmussenip uppernarsassagai. Aamma ilanngullugu paaserusuppaa, Venstret nunanut allanut politikkiat kikkunnit aalajangerneqartarnersoq.
- Danmarkimi ukiuni 50-ini isumaqartuarpugut, Naalagaaffiit Peqatigiit immaqa pitsaalluinnartumik ingerlanneqanngikkaluarlutik, peqatigiiffiusoq pitsaasoq, pitsanngortikkiartuaagassarput tapersersugassarpullu. Taamaattumik Søren Pindip Naalagaaffinnik Peqatigiinnik taamatut saassussinera tupigusuutigaara, isumaqarpungalu Danmarkip Naalagaaffinnut Peqatigiinnut qanoq inissisimanissaa pillugu, Venstret qanoq isumaqarnersut paasilluartariaqaripput. Taamatut oqalunneq Danmarkimi naalakkersuisut manna tikillugu politikerisaanit allaanerulluinnarpoq, taamatullu oqaluttut ministeriunerup inissittariaqarpai, Helle Thorning-Schmidt oqarpoq.
