Venstre ataatsimeersualerpat Atassut peqataassaaq
Venstret, naak qinersinerup kingorna naalakkersuisuujunnaaraluarlutik, qinersinerup kingorna naalakkersuisunngortitsisoqareersorlu qinersisartunik isumasiuinerni tapersersorneqarluarnertik nuannaarutigisinnaavaat, taamaalillutillu Nunatsinni partiimut suleqatiminnut, Atassummut, siunnersuutissaqassallutik.
Tassami Venstret Odensemi ataatsimeersualerpata, Atassutip siulittaasua, Gerhardt Petersen, aamma Atassutip Inuusuttaasa siulittaasuat, Hans Lyberth, tusarnaartuussapput.
Venstret ataatsimeersuarnerannut atatillugu Venstret Atassutillu suleqatigiinnissamut isumaqatigiissutaat oqaloqatigiissutigineqassaaq.
Nunanut allanut tunngasut, Danmarkimi ilinniartunut atugassarititaasut, kalaallit Danmarkimi najugallit, apeqqutillu allat Nunatsinnut attuumassutillit oqaloqatigiissutigineqartussanut ilaasut, Atassutip siulittaasua, Gerhardt Petersen oqarpoq.