Venezuelami tele nalagaaffimmut nuussaaq
Hugo Charves eqqissisimalluinnarpoq decembarimi qinersinermi ajugaareerluni præsidentitut ivertinneqarami.
Qineqqusaarnermini neriorsuutigaa Venezuela socialismemik tunngaveqarluni ingerlanneqalissasoq ivertinneqarnerminilu neriorsuutini eqquutippai oqarasuaatinik ingerlatsineq, innaallagissiorfiit uuliasiornerullu ilaa imminut akilersinnaasoq naalagaaffimmit ingerlanneqalissasut oqaatigigamiuk.
Charves-ip suliffeqarfiit marluk siulliullugit naalagaaffimmit ingerlanneqalersinniagai tassaapput oqarasuaatinik ingerlatsineq aamma innaallagissiorneq.
Suliffeqarfiit taakkua marluk siornatigut naalagaaffimmit ingerlanneqareersimagaluarput, 1990-ikkulli aallartinneranni namminersortunngorsarneqarsimallutik maannalu Charves-ip naalagaaffimmit ingerlanneqaleqqinnissaat kissaatigaa.
Tamanna aningaasarsiornermik kisimi tunngaveqanngilaq. Tassami Venezuela-mi innaallagissiorfik Amerikamiut suliffeqarfissuannit nukissiornermik ingerlatsisumit AES-imit nakkutigineqarpoq aamma Amerikamiut oqarasuaatinik ingerlatsivissuat Veryzone Venezuelami oqarasuaatinik ingerlatsiviup pingajorarterutai piginneqataaffigai.
Taamaalilluni suliffeqarfiit taakkua naalagaaffimmit ingerlanneqartussanngornerat Amerikamiunut unammillertitoqarsuusunut nakeriallannartuuvoq.
Suliffeqarfinnut taakkununnga pappilissat piginneqatigiissutit Venezuelami Amerikami appariarujussuarput.
Aammattaaq Charvesip uuliamik tunisassiorneq iliuuseqarfiginiarpaa Venezuelallu imartaani uuliamik qillerineq naalagaaffimmit ingerlanneqalernissaa piumasarinialerlugu.
