Vega Sagittarius usingiarpaat
Vega Sagittarius suli ikkarlisimagaluartoq umiarsuarnik ajutoortunik suliaqartartunit Smit-imeersunit usingiarneqarpoq taannalu Nuummiit 12 sømilinik kippasinnerusumik suli ikkarlisimavoq. Umiarsuarnik ajutoortunik ukiuuttartut Smit maanna umiarsuarmiilereerput.
- Maannakkut suli oqaatigisinnaanngikkallarparput umiarsuaq qaqugu kaanngarteriarneqassanersoq, umiarsuatileqatigiinnit Vega Reederei-mit Arend Brügge oqarpoq.
- Apeqqutaalluinnarpoq umiarsuaq usingiarlugu qaqugu naammassineqassanersoq. Ulittarnera silalu aamma apeqqutaalluinnarput qaqugorpiaq umiarsuup kaanngarteriarnissaanut, Arend Brügge oqarpoq.
Umiarsuarnik ajutoortunik ikiuuttartut Smit taamatut suliaqartartuni nunarsuaq tamaat anginersanut ilaapput 400-ut sinnerlugit umiarsuaateqarlutik. Taakku Vega Sagittarius 11.000 tonsinik oqimaassusilik kaanngarteriassavaat sisamanngorneq aggustip 16-ianili ikkarlisimasoq.
- Ikkarlinneq qanorpiaq pisimanersoq maanna suli oqaatigisinnaanngikkallarparput, Arend Brügge oqarpoq.
Ikkarlinneq pillugu eqqartuussivimmi nassuiaasoqartussaavoq ikkarlinnermillu ilisimannittut tamarmik tassani nassuiaasussaapput. Tamannali aatsaat pisinnaavoq umiarsuup inuttai Nuummiilerpata.