Vagn Andersen: - Sorlertoruna?

- Aappaagu qanoq pinerpoq arlaatigut iliorluta umiarsuakkut angallassiniaraluassaagut.

Taama radio aviisimut oqarpoq, Arctic Umiaq Line-mi siulersuisut siulittaasuat Vagn Andersen.

Maannalu apeqqutaaginnalerpoq, umiarsuaateqarfik ajutoornermik eqqugaasoq pissutsimisut ingerlaannassanersoq imaluunniit arlaata pisiarissaneraa.

Arctic Umiaq Line-imi siulersuisunngorlaat sapaatip-akunnera kingulleq eqqarsarnartumik suliakkerneqarput. Tassami umiarsuaateqarfik qaammatini qulingiluani namminersortunngorsagaareersorlu piginnittortaavisa taamaateriataarpaat. Millionerpassuit annaaneqarput, sunalu tamarmi isasoorpoq.

Namminersornerullutik Oqartussat Arctic Umiaq Line umiarsuaatai ilanngullugit akiligassaalu tamaasa 4 koruuniliinnarlugit utertippai.

Qanoq ililluni pinerpoq immakkut angallannerup aaqqiivigineqarnissaa siulittaasunngorlaat maannakkorpiaq tamaviaarlutik periarfissat assigiinngitsut pingasut atorlugit sulissutigileruttorpaat.

Siullertut periarfissaavoq, Arctic Umiaq Line-p pissutsimisut ingerlatiinnarneqarnissaa. Taamatulli aaqqiisoqassagaluarpat suminngaanneeraluarnersunik aningaasanik tapiisoqartariaqalissaaq imaluunniit Namminersornerullutik Oqartussat amigartoorutinut sillimmasiisariaqalissalluni.

Aappaattut periarfissaavoq, Royal Arctic Line-p Air Greenlandillu marluullutik umiarsuaateqarfik akisussaaffigilersinnaagaat. Taannalu periarfissaq siulersuisut siulittaasuata Vagn Andersenip periarfissatut piukkunnarluartutut isigaa.

Periarfissallu pingajuat tassaavoq; umiarsuaateqarfiup Arctic Umiaq Line-p allarluinnarnit akisussaaffigineqalersinnaanera.

Tassungalu tunngatillugu siulersuisut siulittaasuat paasissutissaasinnaasunut tunuarsimaarpoq, oqaatigisinnaavaali inuk ataaseq nunatsinneersoq aningaasaliinissamullu soqutigisaqarluartoq saaffiginnissimasoq.

Umiarsuarmik Arctic Umiaq Linep umiarsuaataanik pisissagaanni aningaasivimmiit qasseerlunimita taava akiliisoqarsinnaava?

Sarfaq Ittuk 10 mio. koruuninik naleqarpoq. Disko II 15 mio. koruuninik naleqarpoq, kiisalu Sarpik Ittuk 25 mio. koruuninik naleqarluni.

Sarpik Ittuk Amerika-miunit Quark-imik taaguuteqartunit pisiariniarneqaraluarpoq, taakku 25 mio. koruuneerusupput kisiannili ilaannaa akileriarlugu sinnera akilersorniarsimavaat.

Taamaaliorniarneralli siulersuisut itigartitsissutigaat.

- Tamakkiisumik akilerneqassaaq, taamaanngippat Sarpik Ittuk qaqinneqassaaq, Vagn Andersen oqarpoq.

Arctic Umiaq Line-p siunissaa pillugu sapaatip-akunnerata naanerani siulersuisut politikkerillu aalajangiissapput.